जळगाव (प्रतिनिधी) – : गणेश चतुर्थीच्या दिवशी घरासह कॉलनीमध्ये गणपती स्थापनेची तयारी सुरू असतानाच जळगाव शहरातील तळेले कॉलनी, व दशरथ नगर परिसरात एका विवाहितेने आपल्या चार वर्षांच्या मुलासह गळफास घेऊन आत्महत्या केल्याची धक्कादायक घटना सोमवारी (१४ सप्टेंबर) सायंकाळी सहा वाजेच्या सुमारास उघडकीस आली. हेमांगी निखील महाजन (वय ३०) व त्यांचा मुलगा शौर्य (वय ४) अशी मृतांची नावे आहेत. या घटनेमुळे गणेश स्थापनेच्या आनंदावर विरजण पडून परिसरात शोककळा पसरली
हेमांगी महाजन या तळेले कॉलनी येथे सासरच्या मंडळींसोबत राहत होत्या. त्यांचे पती सैन्य दलात कार्यरत असल्याची माहिती मिळाली आहे. सोमवारी गणेश चतुर्थीनिमित्त कॉलनीतील विघ्नहर्ता गणेश मंडळात गणपती स्थापनेची तयारी सुरू होती. महाजन कुटुंबीयदेखील गणपती स्थापनेसाठी जाण्याच्या तयारीत होते. त्याचदरम्यान हेमांगी या आपल्या चार वर्षांच्या मुलासह खोलीत गेल्या. काही वेळाने कुटुंबीय त्यांना गणपती स्थापनेसाठी बोलावण्यासाठी गेले असता खोलीचा दरवाजा बंद होता. आतून कोणताही प्रतिसाद मिळत नसल्याने कुटुंबीयांनी शनिपेठ पोलिसांना माहिती दिली.
घटनेची माहिती मिळताच पोलीस निरीक्षक डॉ. विशाल जयस्वाल यांच्यासह पोलिस पथक घटनास्थळी दाखल झाले. त्यानंतर दरवाजा उघडून पाहिले असता हेमांगी व त्यांचा मुलगा शौर्य हे गळफास घेतलेल्या अवस्थेत आढळून आले. दोघांना तातडीने शासकीय वैद्यकीय महाविद्यालय व रुग्णालयात दाखल करण्यात आले. मात्र, वैद्यकीय अधिकाऱ्यांनी तपासून दोघांनाही मृत घोषित केले.
या घटनेप्रकरणी शनिपेठ पोलिस ठाण्यात अकस्मात मृत्यूची नोंद करण्यात आली असून, आत्महत्येमागील नेमके कारण काय, याचा तपास पोलिसांकडून सुरू आहे. गणेश चतुर्थीच्या दिवशीच आई व चिमुकल्या मुलाच्या मृत्यूच्या घटनेने तळेले कॉलनी परिसरात हळहळ व्यक्त होत आहे.
