जळगाव (प्रतिनिधी) – सायबर भामट्यांनी व्हॉट्सॲप कॉल करून गुगलवर रिचार्ज अपडेट करण्यास सांगत ७४ वर्षीय निवृत्त व्यक्तीच्या बँक खात्यातून तब्बल १० लाख रुपये ऑनलाइन पद्धतीने लंपास केल्याची घटना जळगाव शहरात घडली. याप्रकरणी सायबर पोलीस ठाण्यात अज्ञात व्यक्तींविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार रमेश नारायण पाटील (वय ७४ रा.महाबळ, जळगाव) यांना दि. ८ सप्टेंबर रोजी त्यांच्या मोबाईल क्रमांकावर व्हॉट्सॲप कॉल आला. समोरील व्यक्तींनी त्यांना गुगलवर जाऊन ‘रिचार्ज अपडेट’ असे टाइप करण्यास सांगितले. त्यानंतर डेबिट कार्डची महिन्याची व वर्षाची माहिती टाकण्यास सांगून, “आता तुमचे रिचार्ज होऊन जाईल,” असे सांगून तक्रारदाराचा विश्वास संपादन केला. यानंतर दि. ९ व १० सप्टेंबर रोजी तक्रारदारांच्या एचडीएफसी बँकेच्या बचत खात्यातून नेट बँकिंगच्या माध्यमातून एफडी प्री-मॅच्युअर करून एकूण १० लाख रुपयांची आर्थिक फसवणूक करण्यात आली. आपली फसवणूक झाल्याचे लक्षात आल्यानंतर तक्रारदारांनी सायबर पोलीस ठाण्यात धाव घेत अज्ञात आरोपींविरुद्ध तक्रार दाखल केली.
याप्रकरणी सायबर पोलीस ठाणे, जळगाव येथे गुन्हा रजिस्टर क्रमांक ३३/२०२६, भारतीय न्याय संहिता कलम ३१८(४), ३(५) अन्वये गुन्हा दाखल करण्यात आला आहे. पुढील तपास पोलीस निरीक्षक प्रदीप ठाकूर करीत आहेत. आरोपी अद्याप अटक झालेला नाही.
