एक लाखांच्या रकमेचा अपहार; डाक विभागातील कर्मचाऱ्यावर फसवणुकीचा गुन्हा
कासोदा उपडाकघरातील प्रकरण
कासोदा | प्रतिनिधी
कासोदा (ता. एरंडोल) येथील उपडाकघरात कार्यरत असताना शासकीय रकमेचा गैरवापर करून शासनाची फसवणूक केल्याप्रकरणी डाक विभागातील कर्मचाऱ्याविरुद्ध कासोदा पोलीस ठाण्यात गुन्हा दाखल करण्यात आला आहे. या प्रकरणात तब्बल एक लाख रुपयांच्या शासकीय रकमेचा अपहार झाल्याचा आरोप आहे.
पोलिसांनी दिलेल्या माहितीनुसार, मोहन मधुकर सपकाळे (वय ४०) हे सध्या डाक विभागात सहाय्यक म्हणून कार्यरत आहेत. ते २७ जुलै २०२३ ते २३ जुलै २०२४ या कालावधीत कासोदा (ता. एरंडोल) येथील उपडाकघरात डाक सहाय्यक पदावर नियुक्त होते.
या कालावधीत उपडाकघरातील खजिनदार शामकांत आर. सोनवणे यांच्याकडून आरोपीने एक लाख रुपये रोख स्वरूपात स्वीकारले, मात्र सदर रक्कम उपडाकघराच्या शासकीय हिशोबात जमा न करता स्वतःच्या फायद्यासाठी वापरल्याचा आरोप तक्रारीत करण्यात आला आहे.
शासकीय रकमेचा वैयक्तिक फायद्यासाठी वापर करून शासनाची फसवणूक केल्याचे तक्रारीत नमूद करण्यात आले आहे.या प्रकरणी तक्रारदार शितल शामराव म्हस्के (वय ५०), सहाय्यक डाक अधीक्षक, जळगाव यांच्या तक्रारीवरून कासोदा पोलीस ठाण्यात गुन्हा रजि. नं. १२८/२०२६ दाखल करण्यात आला आहे. आरोपीविरुद्ध भादंवि कलम ४२०, ४०९ अन्वये गुन्हा दाखल करण्यात आला आहे.या प्रकरणाचा पुढील तपास सहाय्यक पोलीस निरीक्षक श्रीकांत अंकुश पाटील, कासोदा पोलीस ठाणे करीत आहेत
