जळगाव एमआयडीसीतील बाबा नमकीन कंपनीला भीषण आग; लाखोंचे नुकसान
शॉर्ट सर्किटचा प्राथमिक अंदाज; अग्निशमन दलाच्या तत्परतेने मोठी दुर्घटना टळली
जळगाव | प्रतिनिधी
जळगाव शहरातील एमआयडीसी परिसरातील बाबा नमकीन चिवडा कंपनीत मंगळवारी सकाळी भीषण आग लागल्याने परिसरात एकच खळबळ उडाली. कंपनीच्या इमारतीतून धुराचे लोट आणि आगीच्या उंच ज्वाळा उसळत असल्याचे दिसताच नागरिकांनी तातडीने जळगाव महानगरपालिकेच्या अग्निशमन विभागाला माहिती दिली.
घटनेची माहिती मिळताच महानगरपालिकेचे पाच ते सहा अग्निशमन बंब तातडीने घटनास्थळी दाखल झाले. आगीची तीव्रता लक्षात घेऊन अतिरिक्त अग्निशमन बंबही पाचारण करण्यात आले. अग्निशमन जवानांनी शर्थीचे प्रयत्न करत काही तासांच्या अथक प्रयत्नांनंतर आग पूर्णपणे आटोक्यात आणली. त्यामुळे संभाव्य मोठी दुर्घटना टळली.
शॉर्ट सर्किटमुळे आग लागल्याचा प्राथमिक अंदाज
प्राथमिक माहितीनुसार, कंपनीत शॉर्ट सर्किटमुळे आग लागल्याचा अंदाज व्यक्त करण्यात येत आहे. या आगीत कंपनीचे लाखो रुपयांचे आर्थिक नुकसान झाल्याची माहिती समोर आली असून, नुकसानीचा अचूक आकडा आणि आगीचे नेमके कारण तपासानंतर स्पष्ट होणार आहे.
अग्निशमन जवानांचे मोलाचे योगदान
या बचाव मोहिमेत वाहनचालक युसूफ पटेल, मयूर ओतारी, शोएब तडवी तसेच फायरमन योगेश कोल्हे, राकेश सोनवणे, इक्बाल तडवी, राकेश पाटील, विक्की सोनवणे आणि सतार तडवी यांनी धाडसी कामगिरी बजावत आग नियंत्रणात आणण्यात महत्त्वाची भूमिका बजावली.
पोलीस तपास सुरू
दरम्यान, या घटनेची नोंद एमआयडीसी पोलीस ठाण्यात करण्याची प्रक्रिया सुरू असून, आग लागण्याचे नेमके कारण आणि झालेल्या नुकसानीबाबत पुढील तपास सुरू आहे.
