मुक्ताईनगरात मजुराची निर्घृण हत्या; पगार मागितल्याच्या वादातून हॉटेल मालकावर गुन्हा
डोक्यात काठी मारून खून केल्याचा आरोप; पोलिसांनी संशयिताविरुद्ध गुन्हा दाखल
मुक्ताईनगर | प्रतिनिधी
मुक्ताईनगर तालुक्यात पगाराच्या पैशांवरून झालेल्या वादातून एका मजुराची निर्घृण हत्या झाल्याची धक्कादायक घटना समोर आली आहे. या प्रकरणी मृताच्या पत्नीच्या फिर्यादीवरून हॉटेल मालकाविरुद्ध भारतीय न्याय संहिता (BNS) कलम 103(1) अन्वये मुक्ताईनगर पोलिस ठाण्यात खुनाचा गुन्हा दाखल करण्यात आला आहे.
पोलिसांनी दिलेल्या माहितीनुसार, गोकुळ तारासिंग जाधव (रा. निंबापूर, ता. खकनार, जि. बुरहानपूर, मध्य प्रदेश) हे सध्या मुक्ताईनगर तालुक्यात मजुरीचे काम करत होते. त्यांच्या पत्नी सुमित्राबाई गोकुळ जाधव (वय ५५) यांनी याप्रकरणी फिर्याद दिली आहे.
फिर्यादीनुसार, १ ऑगस्ट रोजी मध्यरात्री सुमारे १ वाजेच्या सुमारास मुक्ताईनगर-बुरहानपूर महामार्गालगत उचंदा शिवारातील एका शेताजवळ हा प्रकार घडला. गोकुळ जाधव यांनी हॉटेल मालकाकडे थकीत पगाराची मागणी केली असता वाद झाला. त्यानंतर आरोपी कमलजीतसिंग प्रीतमसिंग (रा. शेर-ए-पंजाब हॉटेल, पूर्णाड फाटा, ता. मुक्ताईनगर) याने काठीने डोक्यावर वार करून गंभीर दुखापत केल्याचा आरोप फिर्यादीत करण्यात आला आहे. या हल्ल्यात गोकुळ जाधव यांचा मृत्यू झाला.
या प्रकरणी मुक्ताईनगर पोलिसांनी संशयिताविरुद्ध खुनाचा गुन्हा दाखल केला असून पुढील तपास सुरू आहे. तपास उपविभागीय पोलीस अधिकारी आणि मुक्ताईनगर पोलिसांच्या मार्गदर्शनाखाली सुरू असल्याची माहिती पोलिसांनी दिली आहे.
