मुसळधार पावसामुळे आकाशवाणी-महाबळ रस्त्यावर पाणी तुंबले
महापौरांच्या सतर्कतेमुळे मोठा अनर्थ टळला, पाणी नाल्यात सोडून मार्ग मोकळा
जळगाव :
शहरात गेल्या दोन दिवसांपासून सुरू असलेल्या संततधार मुसळधार पावसामुळे अनेक भागांत पाण्याचा वेढा पडला आहे. गुरुवारी दुपारी आकाशवाणी चौकाकडून महाबळ रस्त्याकडे जाणाऱ्या जैन मंदिराजवळ विरुद्ध दिशेला मोठ्या प्रमाणावर पाणी साचले होते. महापौरांनी तात्काळ घटनास्थळी पोहोचून सदर पाणी काढण्यासाठी महानगरपालिका अधिकाऱ्यांच्या मदतीने प्रयत्न केले.
हे पाणी थेट एका अभियंत्याच्या घरात शिरल्याने आणि रस्त्यावर तुंबल्याने वाहतुकीचा व नागरिकांच्या सुरक्षेचा मोठा प्रश्न निर्माण झाला होता. घटनेची माहिती मिळताच महापौर दीपमाला काळे यांनी तातडीने घटनास्थळी धाव घेत प्रशासकीय यंत्रणा कामाला लावली. घटनेचे गांभीर्य ओळखून महापौरांनी तात्काळ अग्निशमन दलाचे प्रमुख अश्वजीत घरडे आणि त्यांच्या पथकाला पाचारण केले. घटनास्थळी साचलेल्या पाण्याचा निचरा करण्यासाठी जैन मंदिराच्या बाजूने असलेल्या नाल्याकडे पाण्याचा प्रवाह वळवण्यात आला. अग्निशमन दलाच्या मदतीने तुंबलेले पाणी सुरक्षितपणे नाल्यात प्रवाहित करून परिसर पूर्ववत करण्यात आला.
रस्त्यावर मोठ्या प्रमाणात पाणी साचल्यामुळे महाबळ रस्त्यावरील वाहनधारकांचे मोठे हाल होत होते आणि अपघाताची दाट शक्यता निर्माण झाली होती. महापौरांनी स्वतः उभं राहून तात्काळ ही समस्या मार्गी लावल्याने वाहनधारकांसह परिसरातील नागरिकांनी सुटकेचा श्वास सोडला. यावेळी महापौरांनी स्थानिक नागरिकांशी संवाद साधून त्यांना धीर दिला. या प्रसंगी स्थानिक नगरसेवक नितीन बरडे, मनपा कर्मचारी व परिसरातील नागरिक मोठ्या संख्येने उपस्थित होते. ऐनवेळी दाखवलेल्या सतर्कतेबद्दल आणि तत्पर कारवाईबद्दल नागरिकांनी महापौर दीपमाला काळे व मनपा प्रशासनाचे आभार मानले.
