पुराच्या पाण्यात अडकलेल्या एक महिन्याच्या बाळासह कुटुंबाची सुखरूप सुटका
अमळनेरच्या अग्निशमन दल व आरोग्य कर्मचाऱ्यांचे धाडसी बचावकार्य; नागरिकांकडून कौतुकाचा वर्षाव
अमळनेर | प्रतिनिधी
अमळनेर शहरातील भालेराव नगर परिसरातील गुरुकृपा कॉलनीत मुसळधार पावसामुळे नाल्याला आलेल्या पुरात अडकलेल्या एक महिन्याच्या बाळासह एका कुटुंबाची अमळनेर नगरपालिकेच्या अग्निशमन दल आणि आरोग्य विभागाच्या कर्मचाऱ्यांनी धाडसी बचावकार्य करून सुखरूप सुटका केली. या धाडसी कामगिरीचे सर्वत्र कौतुक होत आहे.
मुसळधार पावसामुळे गुरुकृपा कॉलनीतील नाल्याला मोठा पूर आला होता. परिसरात छातीपर्यंत पाणी साचले होते. एका घरात एक महिन्याचे बाळ, त्याची आई, तीन लहान मुले आणि इतर कुटुंबीय पाण्याने वेढले गेले होते. घरात पाणी शिरल्याने सर्वजण पलंग व उंच जागेवर उभे राहून जीव वाचविण्याचा प्रयत्न करत होते.
दोन तासांच्या प्रयत्नानंतर यश
घटनेची माहिती मिळताच नगरपालिकेचे मुख्याधिकारी गणेश शिंदे यांनी तातडीने बचाव पथक रवाना केले. आरोग्य निरीक्षक किरण कंडारे, गोल्डी बिऱ्हाडे, अग्निशमन कर्मचारी फारुख शेख, दिनेश बिऱ्हाडे, भिका संदानशीव आणि पवन बिऱ्हाडे यांनी घटनास्थळी धाव घेतली.
मात्र, पाण्याचा प्रवाह अत्यंत वेगवान असल्याने सुरुवातीला कुटुंबापर्यंत पोहोचणे शक्य होत नव्हते. त्यानंतर दोरखंड आणि लाइफ जॅकेटची व्यवस्था करून मानवी साखळी तयार करण्यात आली. सुमारे दोन तासांच्या अथक प्रयत्नांनंतर पथक कुटुंबापर्यंत पोहोचण्यात यशस्वी झाले.
प्लास्टिकच्या टबमध्ये बाळाला सुरक्षित बाहेर काढले
बचाव पथकाने अवघ्या एक महिन्याच्या बाळाला प्लास्टिकच्या टबमध्ये अत्यंत काळजीपूर्वक ठेवून सुरक्षित बाहेर काढले. त्यानंतर बाळाची आई, तीन महिला, तीन लहान मुले आणि इतर कुटुंबीयांना जवळील इमारतीच्या तिसऱ्या मजल्यावर सुरक्षित स्थळी हलविण्यात आले.
या धाडसी आणि वेळेवर केलेल्या बचावकार्यातून एका कुटुंबाचे प्राण वाचल्याने परिसरातील नागरिकांनी अग्निशमन दल आणि आरोग्य विभागाच्या कर्मचाऱ्यांचे मनापासून कौतुक केले. तसेच आपत्कालीन परिस्थितीत दाखविलेल्या तत्परतेबद्दल त्यांचे अभिनंदन करण्यात आले.
