फैजपूर उपडाकघरात घरफोडी; २८ हजारांचा ऐवज लांबविला
रोख रक्कम, एसबीआय पीओएस मशीन, स्टॅम्प व अन्य साहित्य चोरी; अज्ञात चोरट्याविरुद्ध गुन्हा
फैजपूर | प्रतिनिधी फैजपूर येथील मधुकर सहकारी साखर कारखाना परिसरातील उपडाकघरात अज्ञात चोरट्याने घरफोडी करून रोख रक्कम व कार्यालयीन साहित्य असा एकूण २८ हजार ७१९ रुपयांचा ऐवज लंपास केल्याची घटना उघडकीस आली आहे. या प्रकरणी फैजपूर पोलीस ठाण्यात अज्ञात आरोपीविरुद्ध भारतीय न्याय संहिता (बीएनएस) कलम ३३१(३), ३३१(४) व ३०५ अन्वये गुन्हा दाखल करण्यात आला आहे.
फिर्यादी फत्तू रमजान तडवी (वय ५७), पोस्टमास्तर, उपडाकघर, फैजपूर यांनी दिलेल्या फिर्यादीनुसार, २८ जुलै रोजी सायंकाळी कार्यालय बंद केल्यानंतर २९ जुलै रोजी सकाळी कार्यालय उघडले असता चोरी झाल्याचे निदर्शनास आले. अज्ञात चोरट्याने उपडाकघराच्या प्रवेशद्वाराचे कुलूप तोडून आत प्रवेश केला आणि लोखंडी तिजोरीसह त्यातील साहित्य चोरी करून नेले.
चोरीस गेलेल्या मुद्देमालामध्ये २३ हजार ५५५ रुपयांची रोख रक्कम, एसबीआयचे पीओएस मशीन, विविध प्रकारचे डेफिनिटिव्ह स्टॅम्प, पोस्टल स्टेशनरी, महसूल स्टॅम्प, एटीएम कार्डे व धनादेश पुस्तिकांसह एकूण २८ हजार ७१९ रुपयांचा ऐवज असल्याचे फिर्यादीत नमूद करण्यात आले आहे.
या प्रकरणाचा पुढील तपास फैजपूर पोलीस ठाण्याचे पोलीस कर्मचारी विकास सोनवणे करीत आहेत.
