महाविद्यालय परिसरात वाहतूक पोलिसांची धडक मोहीम; २४ अल्पवयीन चालकांवर कारवाई
१.४७ लाखांचा दंड, ८२ हजारांची ऑन-द-स्पॉट वसुली; ११९ ई-चलन जारी
जळगाव | प्रतिनिधी
जळगाव शहरातील महाविद्यालय परिसरात वाढत्या वाहतूक नियमभंगाच्या पार्श्वभूमीवर वाहतूक शाखेने विशेष तपासणी मोहीम राबवत अल्पवयीन वाहनचालकांसह वाहतूक नियमांचे उल्लंघन करणाऱ्यांवर धडक कारवाई केली. या मोहिमेत २४ अल्पवयीन चालकांवर कारवाई करण्यात आली असून त्यांच्या पालकांना पोलीस ठाण्यात बोलावून वाहतूक नियमांचे पालन करण्याबाबत समुपदेशन करण्यात आले.
या विशेष मोहिमेदरम्यान विविध वाहतूक नियमांचे उल्लंघन करणाऱ्या वाहनचालकांवर एकूण १ लाख ४७ हजार रुपयांचा दंड ठोठावण्यात आला. त्यापैकी ८२ हजार रुपयांची रक्कम घटनास्थळीच वसूल करण्यात आली. तसेच नियमभंग करणाऱ्या वाहनचालकांविरुद्ध ११९ ई-चलन जारी करण्यात आले.
अल्पवयीन मुलांनी वाहन चालविणे हा स्वतःच्या तसेच इतरांच्या जीवितासाठी गंभीर धोका असल्याने अशा प्रकारांवर कठोर कारवाई सुरूच राहणार असल्याचे वाहतूक पोलिसांनी स्पष्ट केले. यावेळी पालकांनाही आपल्या पाल्यांना वाहन चालविण्यास देताना कायदेशीर जबाबदारीची जाणीव करून देण्यात आली.
ही कारवाई प्रोबेशनरी डीवायएसपी सह्याद्री बिरसे आणि प्रशांत दरेकर यांनी पोलीस निरीक्षक (वाहतूक) यांच्या मार्गदर्शनाखाली केली. शहरातील वाहतूक शिस्त अबाधित राखण्यासाठी आणि अपघातांना आळा घालण्यासाठी अशा विशेष मोहिमा पुढेही सातत्याने राबविण्यात येणार असल्याचे पोलिसांनी सांगितले.
