बनावट शालार्थ आयडी प्रकरण: जळगावचे माजी शिक्षणाधिकारी धुळ्यातून गजाआड
नाशिकरोड पोलिसांची कारवाई!
जळगाव : बनावट शालार्थ आयडी आणि नियमबाह्य वैयक्तिक मान्यता प्रकरणाच्या तपासात नाशिकरोड पोलिसांनी मोठी कारवाई करत जळगाव जिल्हा परिषदेचे माजी माध्यमिक शिक्षणाधिकारी शशिकांत भाऊराव हिंगोणेकर यांना धुळे येथून ताब्यात घेतले आहे. या धडक कारवाईमुळे शिक्षण विभागात प्रचंड खळबळ उडाली असून, कोट्यवधींच्या या बहुचर्चित घोटाळ्याच्या तपासाला आता मोठा वेग आला आहे.
तपासादरम्यान समोर आलेल्या माहितीनुसार, सन २०११ ते २०१५ या कालावधीत जळगाव जिल्ह्यातील २५९ शिक्षक व शिक्षकेतर कर्मचाऱ्यांच्या वैयक्तिक मान्यतेसाठी कोणतेही अधिकृत प्रस्ताव शिक्षणाधिकारी कार्यालयात प्राप्त झालेले नसतानाही संबंधितांना बेकायदेशीरपणे वैयक्तिक मान्यता देण्यात आल्याचे निष्पन्न झाले आहे. गोपनीय माहिती आणि तांत्रिक विश्लेषणाच्या आधारे आरोपी धुळ्यात दडून बसल्याची माहिती मिळताच सहाय्यक पोलीस आयुक्त संदीप मिटके यांच्या मार्गदर्शनाखालील पथकाने तेथे धाड टाकून हिंगोणेकर यांना ताब्यात घेतले व नाशिकरोड पोलीस ठाण्यात आणले.
नाशिक विभागातील नाशिक, जळगाव, धुळे आणि नंदुरबार जिल्ह्यांतील तब्बल ८४१ शिक्षक व कर्मचाऱ्यांच्या वैयक्तिक मान्यता आणि शालार्थ प्रस्तावांमध्ये गंभीर अनियमितता आढळली आहे. मागील तारखांच्या बोगस नियुक्त्या दाखवून बनावट आदेशांच्या आधारे शालार्थ प्रणालीत नोंदी करत शासनाची सुमारे १६० कोटी रुपयांची आर्थिक फसवणूक झाल्याचा संशय आहे. या महाघोटाळ्यात मुख्याध्यापक, संस्थाचालक, तत्कालीन शिक्षण उपसंचालक, शिक्षणाधिकारी व वेतन अधीक्षकांसह १२०० हून अधिक संशयित पोलिसांच्या तपासाच्या कक्षेत आले असून पुढील चौकशी वेगाने सुरू आहे.
