वरणगाव येथे ५.१७ लाखांचा प्रतिबंधित गुटखा जप्त
इनोव्हासह एक ताब्यात
वरणगाव (जि. जळगाव) प्रतिनिधी : वरणगाव पोलिसांनी अन्न व औषध प्रशासनाच्या पथकासह केलेल्या संयुक्त कारवाईत महाराष्ट्रात प्रतिबंधित असलेला ५ लाख १७ हजार ८६८ रुपयांचा गुटखा व पानमसाल्याचा साठा जप्त केला. या कारवाईत वाहतुकीसाठी वापरण्यात आलेली सिल्व्हर रंगाची इनोव्हा (एमएच-20 बीडी-3000) जप्त करण्यात आली असून, एकाला ताब्यात घेण्यात आले आहे.
ही कारवाई २४ जुलै २०२६ रोजी रात्री सुमारे ८.२० वाजता राष्ट्रीय महामार्ग क्रमांक ५३ वरील मुक्ताईनगर–भुसावळ मार्गावरील कपीलवस्ती परिसरात करण्यात आली. वाहनाची तपासणी केली असता त्यामध्ये महाराष्ट्रात विक्रीस प्रतिबंधित असलेला विविध प्रकारचा गुटखा, केसरयुक्त विमल पानमसाला व इतर तंबाखूजन्य पदार्थ आढळून आले.
कारवाईदरम्यान विंग तंबाखू, केसरयुक्त विमल पानमसाला, करमचंद प्रीमियम पानमसाला, केसी-1000 यांसह विविध तंबाखूजन्य पदार्थांचा साठा आणि वाहतुकीसाठी वापरण्यात आलेली इनोव्हा कार असा एकूण ५,१७,८६८ रुपयांचा मुद्देमाल जप्त करण्यात आला. तपासासाठी प्रत्येक प्रकारातील नमुनेही घेण्यात आले आहेत.
या प्रकरणी चेतन लक्ष्मण नारखेडे (वय २८, रा. नशिराबाद, ता. जि. जळगाव) याच्याविरुद्ध अन्न सुरक्षा व मानके कायदा, २००६ तसेच भारतीय न्याय संहिता, २०२३ मधील संबंधित कलमान्वये वरणगाव पोलीस ठाण्यात गुन्हा दाखल करण्यात आला आहे.
या कारवाईस उपविभागीय पोलीस अधिकारी नंदराज पाटील यांचे मार्गदर्शन लाभले. पोलीस निरीक्षक अमितकुमार बागुल यांच्या नेतृत्वाखाली कारवाई करण्यात आली असून, पुढील तपास पोलीस उपनिरीक्षक एम. के. बेंडकोळी करीत आहेत.
