जळगाव रामानंद नगर पोलिसांत सायबर गुन्हा दाखल
जळगाव (प्रतिनिधी) : मोबाईल हॅक करून क्रेडिट कार्डची गोपनीय माहिती मिळवत एका शिक्षकाची ३ लाख २२ हजार ५०० रुपयांची ऑनलाईन फसवणूक झाल्याचा प्रकार उघडकीस आला आहे. याप्रकरणी रामानंद नगर पोलीस ठाण्यात अज्ञात सायबर भामट्याविरुद्ध गुन्हा दाखल करण्यात आला असून पुढील तपास सुरू आहे.
पोलिसांनी दिलेल्या माहितीनुसार, फिर्यादी गिरीश वामनराव देवकर (वय ४५, व्यवसाय – शिक्षक, रा. प्लॉट क्र. ४५, अनुराग कॉलनी, महाबळ, जळगाव) यांच्या मोबाईलची माहिती अज्ञात आरोपीने बेकायदेशीररित्या मिळवली. त्यानंतर फिर्यादीच्या ॲक्सिस बँकेच्या क्रेडिट कार्डची माहिती हस्तगत करून ॲमेझॉन गिफ्ट कार्ड खरेदीच्या माध्यमातून त्यांच्या परवानगीशिवाय ३ लाख २२ हजार ५०० रुपये ऑनलाईन व्यवहारातून लंपास करण्यात आले.
ही घटना ६ जून २०२६ ते ९ जुलै २०२६ या कालावधीत घडल्याचे तक्रारीत नमूद करण्यात आले आहे. फसवणुकीची बाब निदर्शनास आल्यानंतर फिर्यादीने रामानंद नगर पोलीस ठाण्यात धाव घेत तक्रार दाखल केली.
याप्रकरणी रामानंद नगर पोलीस ठाण्यात CCTNS गुन्हा क्रमांक २१८/२०२६ अन्वये भारतीय न्याय संहिता (BNS) कलम ३१८(४), ६६ व ६६(सी) अंतर्गत अज्ञात आरोपीविरुद्ध गुन्हा दाखल करण्यात आला आहे.
या प्रकरणाचा पुढील तपास पोलीस निरीक्षक मधुकर साळवे यांच्या मार्गदर्शनाखाली सुरू असून, सायबर भामट्याचा शोध सुरू आहे.
