अडावद पोलिसांत गुन्हा नोंद; मारहाणीत दोघे गंभीर जखमी, परिसरात खळबळ
अडावद (प्रतिनिधी): चोपडा तालुक्यातील वडी गावाजवळील ताराचंद नगर भागात शेताच्या सामायिक बांधाच्या वादातून ८ जणांच्या टोळक्याने एका वृद्ध शेतकऱ्यासह त्यांच्या मुलावर शेती अवजारांनी जीवघेणा हल्ला केल्याची धक्कादायक घटना घडली आहे. या हल्ल्यात पिता-पुत्र दोघेही गंभीर जखमी झाले असून, अडावद पोलीस ठाण्यात दंगलीसह विविध कलमांखाली ८ जणांविरुद्ध गुन्हा दाखल करण्यात आला आहे.
शेताच्या सामायिक बांधावरून वाद पेटला
मिळालेल्या माहितीनुसार, वडी येथील रहिवासी सुभाष अर्जुन बडगुजर (वय ६०) आणि आरोपींचे शेत लागून असून त्यांच्यात सामायिक बांधावरून जुना वाद आहे. ३ जुलै २०२६ रोजी सायंकाळी ५.०० वाजेच्या सुमारास याच वादावरून दोन्ही गट आमनेसामने आले. वाद विकोपाला गेल्यानंतर आरोपींनी बेकायदेशीर जमाव जमवून सुभाष बडगुजर आणि त्यांचा मोठा मुलगा राजेंद्र बडगुजर यांच्यावर हल्ला चढवला.
शेती अवजारांनी चेहऱ्यावर आणि हातापायावर वार
आरोपींनी हातातील शेती कामाच्या तीक्ष्ण अवजारांनी फिर्यादी सुभाष बडगुजर यांच्या चेहऱ्यावर गंभीर वार केले. तसेच त्यांचा मुलगा राजेंद्र हा वडिलांना वाचवण्यासाठी मधे पडला असता, त्यालाही टोळक्याने घेरून शेतीच्या अवजारांनी हातावर आणि पायावर बेदम मारहाण करून रक्तबंबाळ केले. या हल्ल्यात दोघेही गंभीर जखमी झाले आहेत.
८ जणांविरुद्ध गुन्हा दाखल; ‘ई-साक्ष’चा वापर
याप्रकरणी जखमी वृद्ध शेतकरी सुभाष अर्जुन बडगुजर (वय ६०, रा. वडी, ता. चोपडा, जि. जळगाव) यांनी ४ जुलै रोजी दुपारी ४.३१ वाजता अडावद पोलीस ठाण्यात रीतसर फिर्याद दिली. त्यांच्या तक्रारीवरून पोलिसांनी गावातीलच ८ जणांविरुद्ध गुन्हा दाखल केला आहे.
आरोपींची नावे:- सुनील परशुराम सुलताने, निखिल परशुराम सुलताने, चेतन रतिलाल सुलताने, विजय गोपाळ सुलताने, कमलाकर गोपाळ सुलताने, सुमित माधवराव सुलताने, परशुराम राघव सुलताने, ज्ञानेश्वर परशुराम सुलताने (सर्व रा. वडी, ता. चोपडा).
या सर्वांविरुद्ध अडावद पोलीस ठाण्यात गुन्हा रजि. नं. १४३/२०२६ नुसार भारतीय न्याय संहिता (BNS) २०२३ चे कलम ११८(१) (घातक शस्त्राने दुखापत करणे), १८९(२) (बेकायदेशीर जमाव), १९१(२) (दंगल), १९०, ३५२, आणि ३५१(२) प्रमाणे गुन्हा दाखल करण्यात आला आहे. या गुन्ह्याची नोंद करताना पोलिसांनी ‘ई-साक्ष’ प्रणालीचा वापर केला आहे.
या घटनेमुळे वडी गावात काही काळ तणावाचे वातावरण निर्माण झाले होते. अडावद पोलीस ठाण्याचे सहाय्यक पोलीस निरीक्षक (सपोनि) प्रशांत मधुकर कंडाळकर यांच्या मार्गदर्शनाखाली पोलीस हेड कॉन्स्टेबल (पोहेकॉ/३११६) विनोद धनगर पुढील तपास करत आहेत. या गुन्ह्यात अद्याप कोणालाही अटक करण्यात आलेली नाही.
