एकलग्न गावातील संतापजनक घटना; अपघातानंतर चालकाने दुर्लक्ष करत वृद्धाच्या अंगावर घातले चाक
धरणगाव (प्रतिनिधी): तालुक्यातील एकलग्न गावामध्ये एका ट्रक चालकाच्या अक्षम्य निष्काळजीपणामुळे ७५ वर्षीय वृद्ध शेतकऱ्याला आपला जीव गमावावा लागल्याची धक्कादायक घटना घडली आहे. ट्रक मागे घेताना क्लीनर किंवा इतर कोणाचीही मदत न घेता चालकाने आधी वृद्धाला धडक दिली आणि नंतर खाली पडलेल्या वृद्धाकडे दुर्लक्ष करत ट्रक पुन्हा मागे घेऊन थेट अंगावर चाक चढवले. या भयंकर अपघातात गंभीर जखमी झालेल्या वृद्धाचा जागीच मृत्यू झाला आहे.
मिळालेल्या माहितीनुसार, ३ जुलै २०२६ रोजी दुपारी ११.४५ वाजेच्या सुमारास एकलग्न गावातील विजय प्रल्हाद पाटील यांच्या ‘कालिका ॲग्रो एजन्सी’ या कृषी दुकानासमोर हा अपघात घडला. आरोपी चालक शेख अमीन शेख नबी (रा. जळगाव) हा त्याच्या ताब्यातील ट्रक (क्रमांक MH 19 Z 2011) घेऊन आला होता. दुकानावरून परत जात असताना, त्याने आजूबाजूच्या परिस्थितीचा कोणताही अंदाज न घेता आणि ट्रकच्या पाठीमागे पाहण्यासाठी क्लीनर अथवा इतर कोणत्याही व्यक्तीची मदत न घेता निष्काळजीपणे ट्रक मागे (रिव्हर्स) घेतला.
ट्रक मागे घेत असताना रस्त्याने जाणारे वृद्ध उत्तम मोहन पाटील यांना ट्रकच्या क्लीनर साईडच्या मागील बाजूची जोरदार धडक बसली. धडक लागल्याने ते खाली कोसळले. हे पाहूनही ट्रक चालकाने गाडी न थांबवता, पडलेल्या व्यक्तीकडे पूर्णपणे दुर्लक्ष केले. त्याने पुन्हा जोरात ट्रक मागे घेतला, ज्यामुळे उत्तम पाटील हे ट्रकच्या क्लीनर साईडच्या मागील चाकाखाली दाबले गेले. या भीषण अपघातात गंभीर दुखापत झाल्याने त्यांचा मृत्यू झाला.
याप्रकरणी मयत वृद्धाचे सुपुत्र फिर्यादी कमलाकर उत्तम पाटील (वय ५०, व्यवसाय- मजुरी, रा. एकलग्न बु॥, ता. धरणगाव, जि. जळगाव) यांनी ४ जुलै रोजी दुपारी ३.२५ वाजता धरणगाव पोलीस ठाण्यात तक्रार नोंदवली.
त्यांच्या फिर्यादीवरून ट्रक चालक शेख अमीन शेख नबी (रा. जळगाव) याच्याविरुद्ध धरणगाव पोलीस ठाण्यात गुन्हा रजि. नं. २५४/२०२६ नुसार भारतीय न्याय संहिता (BNS) २०२३ चे कलम १०६(१) (निष्काळजीपणामुळे मृत्यूस कारणीभूत ठरणे), ३२४(२)(६) (घातक ड्रायव्हिंग) आणि मोटार वाहन कायदा कलम १८४ प्रमाणे गुन्हा दाखल करण्यात आला आहे.
या गंभीर गुन्ह्याची नोंद करताना धरणगाव पोलिसांनी ‘ई-साक्ष’ प्रणालीचा वापर केला आहे. घटनेची माहिती मिळताच धरणगाव पोलीस ठाण्याचे पोलीस निरीक्षक (पोनि) उमाकांत गायकवाड यांनी घटनास्थळी भेट दिली. त्यांच्या मार्गदर्शनाखाली पोलीस उपनिरीक्षक (पीएसआय) दत्तात्रय गिरिधर बडगुजर पुढील तपास करत आहेत. या अपघातातील आरोपी ट्रॅक्टर/ट्रक चालकाला अद्याप अटक करण्यात आलेली नाही. या घटनेमुळे एकलग्न परिसरात तीव्र हळहळ आणि संताप व्यक्त केला जात आहे.
