सीसीटीव्ही आणि तांत्रिक तपासाच्या आधारे गुन्ह्याचा उलगडा; १.७१ लाखांचे पाच मोबाईल जप्त
जळगाव ( प्रतिनिधी ) – जळगाव शहरातील नवीन बसस्थानक परिसरात घडलेल्या महागड्या मोबाईल चोरीच्या गुन्ह्याचा जिल्हापेठ पोलिसांनी अवघ्या काही दिवसांत यशस्वी उलगडा करत एका विधी संघर्ष बालकास ताब्यात घेतले आहे. त्याच्याकडून चोरीस गेलेल्या आयफोनसह एकूण १ लाख ७१ हजार ५०० रुपये किमतीचे पाच मोबाईल फोन जप्त करण्यात आले आहेत.
बसस्थानकात आयफोन लंपास
फिर्यादी संकेत सुरेश नारखेड यांनी ४ जून रोजी जिल्हापेठ पोलीस ठाण्यात तक्रार दाखल केली होती. २९ मे रोजी कामानिमित्त जळगावच्या नवीन बसस्थानकात आले असता त्यांच्या पँटच्या खिशातून १ लाख ३२ हजार ५०० रुपये किमतीचा अॅपल कंपनीचा आयफोन 17 प्रो अज्ञात चोरट्याने चोरून नेला होता. या प्रकरणी भारतीय न्याय संहिता कलम ३०३(२) अन्वये गुन्हा दाखल करण्यात आला होता.
सीसीटीव्ही आणि तांत्रिक तपास ठरला निर्णायक
घटनेचे गांभीर्य लक्षात घेऊन पोलीस अधीक्षक श्रीकांत धिवरे यांनी जिल्हापेठ पोलीस ठाण्याचे प्रभारी अधिकारी तथा सहायक पोलीस निरीक्षक अनिल वाघ यांना गुन्हा तातडीने उघड करण्याच्या सूचना दिल्या. त्यानुसार गुन्हे शोध पथकाने बसस्थानक परिसरातील सीसीटीव्ही फुटेजचे बारकाईने विश्लेषण केले. तांत्रिक तपास आणि गुप्त माहितीदारांकडून मिळालेल्या माहितीच्या आधारे संशयिताचा माग काढण्यात आला.
चौकशीत चोरीची कबुली
तपासादरम्यान तांबापुरा परिसरातून एका विधी संघर्ष बालकास ताब्यात घेण्यात आले. चौकशीदरम्यान त्याने मोबाईल चोरीची कबुली दिली. त्याच्याकडून चोरीस गेलेला आयफोन 17 प्रोसह विविध कंपन्यांचे आणखी चार मोबाईल फोन असा एकूण १ लाख ७१ हजार ५०० रुपयांचा मुद्देमाल जप्त करण्यात आला.
पोलिसांच्या तत्परतेचे कौतुक
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावित आणि उपविभागीय पोलीस अधिकारी नितीन गणापुरे यांच्या मार्गदर्शनाखाली पार पडली. सहायक पोलीस निरीक्षक अनिल वाघ यांच्या नेतृत्वाखाली पोहेकॉ किरण वानखेडे, रविंद्र ठाकरे, नरेंद्र दिवेकर, अमित मराठे आणि प्रविण जाधव यांनी या कारवाईत महत्त्वाची भूमिका बजावली.
