सोन्याचा हार व रोकड असा ६५ हजारांचा ऐवज चोरीला; अज्ञाताविरोधात गुन्हा
यावल (प्रतिनिधी) :- शहरातील बसस्थानक परिसरात प्रवाशांच्या गर्दीचा फायदा घेत अज्ञात चोरट्याने पर्स लांबविल्याची घटना उघडकीस आली आहे. या पर्समध्ये सोन्याचा हार व रोकड असा एकूण ६५ हजार रुपयांचा ऐवज होता. प्रकरणी यावल पोलीस ठाण्यात अज्ञात व्यक्तीविरोधात चोरीचा गुन्हा दाखल करण्यात आला आहे.
पोलिसांनी दिलेल्या माहितीनुसार, हाफीजखान अब्बासखान (वय ४९, रा. गट नं. ३१, ताहेनगर, फैजपूर ता. यावल) हे पत्नी व मुलीसह २४ मे रोजी सकाळी साडेदहा वाजेच्या सुमारास यावल बसस्थानक परिसरात आले होते. बसस्थानकातील कंट्रोल केबिनजवळील ओट्यावर बसून ते नाश्ता करत असताना त्यांच्या जवळ ठेवलेली पर्स अज्ञात चोरट्याने चोरून नेली.
या पर्समध्ये सुमारे ८ ग्रॅम वजनाचा सोन्याचा हार तसेच ५ हजार रुपये रोख रक्कम असा एकूण ६५ हजार रुपयांचा ऐवज होता. काही वेळानंतर पर्स चोरीला गेल्याचे लक्षात येताच परिसरात शोधाशोध करण्यात आली. मात्र पर्स आढळून न आल्याने त्यांनी यावल पोलीस ठाण्यात धाव घेत तक्रार दिली.
या प्रकरणी भारतीय न्याय संहिता कलम ३०३(२) अन्वये अज्ञात चोरट्याविरोधात गुन्हा दाखल करण्यात आला आहे. पोलीस निरीक्षक अजयकुमार वाघवे यांच्या मार्गदर्शनाखाली पुढील तपास पोहेकॉ राजेंद्र पवार करीत आहेत.
