भुसावळ ( प्रतिनिधी):- लग्न आणि शारीरिक संबंधांची मागणी फेटाळल्याचा राग मनात धरून एका १७ वर्षीय अल्पवयीन मुलीचा विनयभंग करत, सोशल मीडियावर तिची बदनामी केल्याची धक्कादायक घटना भुसावळ शहरात उघडकीस आली आहे. संशयित आरोपीने पीडितेच्या नावाने इन्स्टाग्रामवर बनावट अकाउंट तयार करून तिचे फोटो पोस्ट केले, तसेच कुटुंबाला जीवे मारण्याची धमकी दिली. या प्रकरणी पीडित मुलीच्या फिर्यादीवरून भुसावळ शहर पोलीस ठाण्यात जळगाव येथील एका २२ वर्षीय तरुणाविरुद्ध पोक्सो कायद्यासह भारतीय न्याय संहितेच्या विविध कलमांनुसार गुन्हा दाखल करण्यात आला आहे.
प्राप्त माहितीनुसार, पीडित अल्पवयीन मुलगी (वय १७ वर्षे १० महिने, रा. भुसावळ) आणि संशयित आरोपी सागर पाटील (वय २२, रा. कुसुंबा, ता. जळगाव) यांची जानेवारी २०२३ पासून ओळख होती. या ओळखीचे रूपांतर पुढे मैत्रीत झाले. दरम्यान, जानेवारी २०२५ मध्ये संशयित आरोपी सागर याने पीडित मुलगी अल्पवयीन असल्याचे माहीत असतानाही तिच्याकडे लग्नाची आणि शारीरिक संबंध ठेवण्याची मागणी केली. मात्र, पीडितेने या गोष्टीला स्पष्ट नकार दिला. या नकाराचा राग आल्यामुळे आरोपीने जानेवारी २०२५ पासून ते आजतागायत पीडितेचा मानसिक छळ सुरू केला. ती भुसावळ येथील आपल्या घरी असताना, तसेच क्लासमध्ये जात-येत असताना आरोपीने तिचा सातत्याने पाठलाग केला आणि तिच्या मनास लज्जा उत्पन्न होईल असे कृत्य केले.
या छळवणुकीची परिसीमा गाठत संशयित आरोपी सागर पाटील याने सोशल मीडियाचा गैरवापर केला. त्याने पीडित मुलीच्या नावाचा वापर करून इन्स्टाग्रामवर एक बनावट अकाउंट ओपन केले. या बनावट अकाउंटवर त्याने पीडितेच्या परवानगीशिवाय स्वतःचे आणि तिचे एकत्रित फोटो पोस्ट करून तिची सामाजिक बदनामी केली. एवढ्यावरच न थांबता त्याने पीडित मुलीच्या कुटुंबीयांचे बरेवाईट करण्याची (जीवे मारण्याची) धमकी देखील दिली. या सततच्या त्रासाला कंटाळून अखेर पीडितेने पोलीस ठाण्यात धाव घेतली.
पीडित मुलीने दिलेल्या फिर्यादीवरून २४ मे २०२६ रोजी रात्री १ वाजून ३७ मिनिटांनी भुसावळ शहर पोलीस ठाण्यात गुन्हा रजि. नं. ११५/२०२६ अन्वये भारतीय न्याय संहिता (BNS) २०२३ चे कलम ७८, ३५१(२) आणि बालकांचे लैंगिक अपराधांपासून संरक्षण अधिनियम २०१२ (पोक्सो) चे कलम ११ व १२ प्रमाणे गुन्हा दाखल करण्यात आला आहे. घटनेची माहिती मिळताच भुसावळ शहर पोलीस ठाण्याचे पोलीस निरीक्षक उद्धव डमाळे यांनी तातडीने तपासाची चक्रे फिरवली आहेत. या प्रकरणाचा पुढील सखोल तपास सहाय्यक पोलीस निरीक्षक राहुल भंडारे करत आहेत.
