कापणीसाठी तयार केळी, ठिबक नळ्या व पाइप जळून खाक
यावल ( प्रतिनिधी ) – तालुक्यातील बोरावल बुद्रुक शिवारात शनिवारी सकाळी एका शेतकऱ्याच्या केळी बागेला अचानक आग लागून मोठे नुकसान झाले. या आगीत कापणीसाठी तयार असलेली केळी, ठिबक सिंचनाच्या नळ्या आणि पाइप जळून खाक झाले असून शेतकऱ्याचे सुमारे दीड लाख रुपयांचे नुकसान झाल्याचा अंदाज व्यक्त करण्यात आला आहे.
राजोरा येथील शेतकरी महेंद्र जगन्नाथ कोळी यांचे बोरावल बुद्रुक शिवारातील गट क्रमांक १७७ मध्ये शेत आहे. त्यांनी या शेतात सुमारे ३ हजार ५०० केळी खोडांची लागवड केली होती. सध्या केळी बाग पूर्णपणे बहरात आली होती आणि केळी कापणीयोग्य झाली होती.
दरम्यान, शनिवारी सकाळच्या सुमारास अचानक केळी बागेला आग लागली. या आगीत झाडांवरील केळीचे घड, ठिबक सिंचनाच्या नळ्या तसेच पाइपसह इतर साहित्य जळून खाक झाले. आग इतकी वेगाने पसरली की काही वेळातच मोठ्या प्रमाणात नुकसान झाले.
या घटनेमुळे शेतकऱ्याच्या हाता-तोंडाशी आलेले उत्पादन अक्षरशः राख झाल्याने महेंद्र कोळी हे हवालदिल झाले आहेत. आग नेमकी कशामुळे लागली याचे कारण अद्याप स्पष्ट झाले नसून प्रशासनाकडून पंचनामा करण्याची मागणी करण्यात येत आहे.
