चोपडा ( प्रतिनिधी ) – तालुक्यातील मोरचिडा गावात जागेच्या वादातून दोन गटांमध्ये झालेल्या मारहाणीत एक जण गंभीर जखमी झाला असून चोपडा ग्रामीण पोलिस ठाण्यात पाच जणांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, २० मे रोजी सायंकाळी सात वाजेच्या सुमारास मोरचिडा गावातील एका जागेवर गुरांचा गोठा बांधण्याच्या कारणावरून हा वाद उफाळला. फिर्यादी विशाल निंबा भादले (वय २५, व्यवसाय शेती, रा. मोरचिडा ता. चोपडा) आणि त्यांचा भाऊ वशिल भादले हे त्यांच्या मालकीच्या जागेवर गोठ्याचे काम करीत असताना आरोपी तेथे आले.
यावेळी “ही जागा आमची आहे, येथे गोठा बांधू नका,” असे म्हणत आरोपींनी लाकडी काठ्या व इतर वस्तूंनी मारहाण केल्याचा आरोप आहे. या हल्ल्यात फिर्यादीच्या भावाच्या नाकावर काठी मारण्यात आल्याने त्याच्या नाकाचे हाड फ्रॅक्चर झाले. तसेच दोघांनाही लाथाबुक्क्यांनी मारहाण करण्यात आली.
या प्रकरणी संदीप गुंजार्या भादले, मोहित सुनील भादले, राहुल सुरेश भादले, छायाबाई संदीप भादले आणि सुनील गुंजार्या भादले (सर्व रा. मोरचिडा, ता. चोपडा) यांच्याविरुद्ध भारतीय न्याय संहितेच्या विविध कलमान्वये गुन्हा दाखल करण्यात आला आहे.
घटनेनंतर परिसरात काही काळ तणावाचे वातावरण निर्माण झाले होते. पुढील तपास चोपडा ग्रामीण पोलीस करीत आहेत.
