क्रेडिट कार्ड माहिती चोरून अज्ञात आरोपींकडून व्यवहार; पोलिसात गुन्हा दाखल
जळगाव (प्रतिनिधी) :- धरणगाव येथील एका आयटी क्षेत्रात कार्यरत कर्मचाऱ्याची ऑनलाइन माध्यमातून तब्बल 74 हजार रुपयांची फसवणूक झाल्याची घटना उघडकीस आली आहे. अज्ञात आरोपींनी इलेक्ट्रॉनिक माध्यमांचा वापर करून फिर्यादीची वैयक्तिक माहिती व क्रेडिट कार्ड तपशील चोरून ऑनलाइन व्यवहार केल्याचे समोर आले आहे.
पोलिसांनी दिलेल्या माहितीनुसार, लक्ष्मण संतोष बाविस्कर (वय 38) असे फसवणूक झालेल्या व्यक्तीचे नाव आहे. ते आयटी विभागात नोकरीस असून सध्या डोंबिवली येथे वास्तव्यास आहेत. त्यांचे मूळ गाव धरणगाव तालुक्यात आहे.
याबाबत धरणगाव पोलीस ठाण्यात दाखल फिर्यादीनुसार, दिनांक 14 मे 2026 रोजी दुपारी 2 ते रात्री 8.30 वाजेदरम्यान अज्ञात आरोपींनी इलेक्ट्रॉनिक माध्यमातून फिर्यादीची ओळख व क्रेडिट कार्डची माहिती चोरली. त्यानंतर संबंधित कार्डचा वापर करून विविध ऑनलाइन व्यवहार करण्यात आले.
या व्यवहारातून आरोपींनी एकूण 74 हजार 20 रुपयांच्या वस्तू खरेदी करून फिर्यादीची आर्थिक फसवणूक केली. व्यवहाराची माहिती मिळाल्यानंतर फिर्यादीने तातडीने धरणगाव पोलीस ठाण्यात धाव घेत तक्रार दाखल केली.
या प्रकरणी धरणगाव पोलीस ठाण्यात भारतीय न्याय संहिता कलम 318(4), 319(2) तसेच माहिती तंत्रज्ञान अधिनियम 2000 मधील कलम 66(C) व 66(D) अन्वये गुन्हा दाखल करण्यात आला आहे.
या प्रकरणाचा पुढील तपास पोलीस निरीक्षक सुनील पवार करीत असून अद्याप आरोपींचा शोध सुरू आहे.
