मालदाभाडी ते वाडी किल्ला दरम्यान ट्रकची मोटारसायकलला जोरदार धडक
जामनेर (प्रतिनिधी) :- जळगाव जिल्ह्यातील जामनेर तालुक्यात मालदाभाडी ते वाडी किल्ला दरम्यान गुरुवारी सुमारे चार वाजेच्या सुमारास भीषण अपघात घडला. ट्रकने मोटारसायकलला जोरदार धडक दिल्याने झालेल्या या दुर्घटनेत सहा जणांचा मृत्यू झाल्याची प्राथमिक माहिती समोर आली आहे.
मृतांमध्ये तीन लहान मुले आणि तीन प्रौढ व्यक्तींचा समावेश असल्याचे सांगण्यात येत आहे. या हृदयद्रावक घटनेमुळे संपूर्ण जामनेर तालुक्यावर शोककळा पसरली आहे.
अपघाताची तीव्रता मोठी असल्याने घटनास्थळी एकच खळबळ उडाली. घटनेची माहिती मिळताच मंत्री गिरीश महाजन यांचे कार्यकर्ते तथा आरोग्यदूत जालमसिंग यांनी घटनास्थळी धाव घेत मदतकार्य सुरू केले.
अपघातातील मृतांना जामनेर ग्रामीण रुग्णालयात हलविण्यात आले असून, मृतांची ओळख पटविण्याचे काम सुरू असल्याची माहिती आहे. या भीषण दुर्घटनेची माहिती समजताच जामनेर ग्रामीण रुग्णालयाबाहेर नागरिकांची मोठी गर्दी जमली आहे. तीन लहान मुलांसह सहा जणांचा मृत्यू झाल्याच्या वृत्ताने परिसरात हळहळ व्यक्त होत आहे. हा अपघात मन हेलावून टाकणारा असून, मृतांची ओळख आणि अपघाताची नेमकी कारणे याबाबत अधिकृत माहिती मिळण्याची काम सुरू आहे.
