पाणबुडी मोटार काढताना पाय घसरून विहिरीत पडले; वडिलांच्या निधनानंतर अवघ्या तेरा दिवसांत काळाचा घाला
शिरसोली (प्रतिनिधी) :- जळगाव तालुक्यातील शिरसोली प्र. बो. येथील सुई बरडी शिवारात स्वतःच्या शेतातील विहिरीतून पाणबुडी मोटार बाहेर काढत असताना पाय घसरून विहिरीत पडल्याने विश्वनाथ भिका ताडे (वय ५०) यांचा दुर्दैवी मृत्यू झाला. आज गुरुवारी (दि. १५ ऑक्टोबर) दुपारी सुमारे १.३० वाजेच्या सुमारास ही घटना घडली. या घटनेमुळे शिरसोली परिसरात हळहळ व्यक्त होत असून ताडे कुटुंबावर दुःखाचा डोंगर कोसळला आहे.
मिळालेल्या माहितीनुसार, शिरसोली येथील विश्वनाथ भिका
ताडे हे त्याच्या स्वताच्या शेतातील विहिरीतून पाणबुडी मोटार बाहेर काढत होते. यावेळी अचानक त्यांचा पाय घसरल्याने तोल जाऊन ते विहिरीत पडले. घटना लक्षात येताच वासुदेव ताडे, अनिल ताडे, योगेश बुंधे आणि रामकृष्ण ताडे यांनी तत्काळ त्यांना विहिरीतून बाहेर काढले. त्यानंतर त्यांना तातडीने जळगाव येथील शासकीय वैद्यकीय महाविद्यालय व रुग्णालयात दाखल करण्यात आले. मात्र, तेथील वैद्यकीय अधिकाऱ्यांनी तपासणी करून त्यांना मृत घोषित केले.
विशेष म्हणजे, विश्वनाथ ताडे यांच्या वडिलांचे अवघ्या तेरा दिवसांपूर्वी अल्पशा आजाराने निधन झाले होते. त्यानंतर आता विश्वनाथ यांचाही अशा दुर्दैवी घटनेत मृत्यू झाल्याने ताडे कुटुंबावर दुःखाचा डोंगर कोसळला आहे. त्यांच्या पश्चात पत्नी आणि दोन मुली असा परिवार आहे.
या घटनेप्रकरणी एमआयडीसी पोलीस ठाण्यात अकस्मात मृत्यूची नोंद करण्याची प्रक्रिया सुरू होती.
