महापौर दीपमाला काळे यांचा जागतिक महिला दिनाच्या पार्श्वभूमीवर महिलांशी संवाद
जळगाव (प्रतिनिधी):- स्त्री शक्तीने शहराच्या प्रगतीत योगदान द्यावे, संसाराच्या रहाटगाड्यात स्वतःला देखील वेळ देऊन स्वतःला निरोगी ठेवावे, असे आवाहन जळगाव शहर महानगरपालिकेच्या महापौर दीपमाला काळे यांनी केले आहे. जळगावकर महिलांशी जागतिक महिला दिनाच्या पूर्वसंध्येला संवाद साधत त्यांना सामाजिक आणि कौटुंबिक प्रगतीसाठी शुभेच्छा दिल्या आहेत.
महापौर दीपमाला काळे यांनी शहरातील महिलांच्या कर्तृत्वाचा गौरव केला असून, जळगावला अधिक सुंदर आणि प्रगत करण्यासाठी महिलांनी पुढाकार घेण्याचे आवाहन केले आहे. स्त्री ही कुटुंबाचा आधार आणि समाजाचा कणा आहे. आज जळगाव शहरातील महिला प्रत्येक क्षेत्रात,मग ते शिक्षण असो, व्यापार असो वा समाजकारण—आपल्या कर्तृत्वाचा ठसा उमटवत आहेत, याचा मला अभिमान वाटतो.
जळगाव महानगरपालिका महिलांच्या सक्षमीकरणासाठी आणि सुरक्षिततेसाठी सदैव कटिबद्ध आहे. महिलांनी केवळ चूल आणि मूल यात न अडकता आपल्या पंखांना बळ द्यावे आणि स्वप्नांचा पाठलाग करावा. स्वतःच्या आरोग्याची आणि स्वाभिमानाची जपणूक करा, कारण तुम्ही सक्षम असाल तरच घर आणि शहर सक्षम होईल, असेही महापौर दीपमाला काळे यांनी सांगितले आहे.
संदेशातील ठळक मुद्दे
सक्षमीकरण : महिलांनी केवळ घरापुरते मर्यादित न राहता प्रशासकीय आणि सामाजिक कामात आपला सहभाग वाढवावा.
स्वच्छता मोहिमेत सहभाग : “आपले शहर, आपली जबाबदारी” या नात्याने जळगाव शहर स्वच्छ आणि हरित ठेवण्यासाठी महिलांनी पुढाकार घ्यावा. ओला व सुका कचरा वेगळा करूनच घंटागाडीत टाकावा, असे आवाहन महापौरांनी केले आहे.
आरोग्य आणि शिक्षण : घरातील आरोग्य जपण्यासोबतच स्वतःच्या आरोग्याकडे दुर्लक्ष करू नका आणि मुलींच्या शिक्षणाला प्राधान्य द्या, असा मोलाचा सल्ला त्यांनी दिला.
शासकीय योजना : महानगरपालिकेच्या महिला व बालकल्याण विभागामार्फत राबवल्या जाणाऱ्या विविध योजनांचा लाभ घेण्याचे आवाहनही त्यांनी यावेळी केले.
“जळगावच्या प्रत्येक महिलेमध्ये एक उपजत नेतृत्वशक्ती आहे. महिलांनी आपले मानसिक आरोग्य सक्षम ठेवणे खूप महत्त्वाचे आहे. त्याच्यासाठी दररोज योगा, व्यायाम, पायी करणे यापैकी एकाला तरी प्राधान्य द्यावे. जेव्हा एक स्त्री सक्षम होते, तेव्हा संपूर्ण कुटुंब आणि पर्यायाने समाज प्रगत होतो. जळगाव शहराच्या सर्वांगीण विकासासाठी मला आपल्या सहकार्याची आणि आशीर्वादाची गरज आहे.”
— दीपमाला काळे, महापौर,
जळगाव महानगरपालिका.
