जळगाव शहरातील इच्छादेवी चौकात घडली सकाळी घटना
जळगाव ( प्रतिनिधी ) – शहरातील इच्छादेवी चौकात आज मंगळवारी दिनांक १६ रोजी सकाळी सव्वा सहा वाजता ओमनी कारने दिलेल्या धडकेत झालेल्या भीषण अपघातात सायकलस्वार वृद्धाचा मृत्यू झाला. जिल्हापेठ पोलीस स्टेशनला नोंद करण्याचे काम सुरू होते.
या अपघातात वसंत प्रताप पाटील (वय-७०, रा. खंडेराव नगर) यांचा जागीच मृत्यू झाला. मंगळवारी सकाळी वसंत पाटील हे सायकलने आपल्या घरी परत जात होते. इच्छादेवी चौकात ते पोहोचले असता, समोरून चुकीच्या मार्गाने येणाऱ्या एका ओमनी कारने त्यांना धडक दिली. धडक इतकी जोरदार होती की वसंत पाटील रस्त्यावर कोसळले आणि गंभीर जखमी झाले. परिसरातील नागरिकांनी तात्काळ धाव घेऊन त्यांना खाजगी वाहनाने शासकीय वैद्यकीय महाविद्यालयात दाखल केले. मात्र, वैद्यकीय अधिकारी हनिफा मोमीन यांनी तपासणी केल्यानंतर त्यांना मृत घोषित केले.
या अपघाताची माहिती मिळताच वसंत पाटील यांच्या नातेवाईकांनी रुग्णालयात धाव घेतली. या घटनेची नोंद जिल्हापेठ पोलीस ठाण्यात करण्यात आली असून, पोलीस पुढील तपास करत आहेत.
