धरणगाव तालुक्यातील बांभोरी येथील घटना
जळगाव (प्रतिनिधी) :- जळगाव शहराला लागून असलेल्या व धरणगाव तालुक्यातील बांभोरी येथे एका तरुणाचा नदीत बुडून मृत्यू झाल्याची घटना शुक्रवारी दि. २९ रोजी संध्याकाळी साडेचार वाजता घडली. याप्रकरणी एमआयडीसी पोलीस स्टेशनला प्राथमिक अकस्मात मृत्यूची नोंद घेण्याचे काम सुरु होते.
राजू पावरा (वय ४५, रा. पद्मालय ता. एरंडोल) असे मयत तरुणाचे नाव आहे. गावात तो परिवारासह राहत होता. मजुरी काम करून तो परिवाराचा उदरनिर्वाह करीत होता. दरम्यान, शुक्रवारी दुपारी राजू हा बांभोरी येथे गेले होता. काही वेळाने गिरणा नदीत बुडून त्याचा मृत्यू झाल्याचे ग्रामस्थांना दिसून आले. त्याचा मृतदेह शासकीय वैद्यकीय महाविद्यालय व रुग्णालयात दाखल करण्यात आला असता वैद्यकीय अधिकाऱ्यांनी तपासून मयत घोषित केले.
यावेळी कुटुंबीयांनी शोक व्यक्त केला. घटनेप्रकरणी पद्मालय येथे शोककळा पसरली असून एमआयडीसी पोलीस स्टेशन येथे प्राथमिक अकस्मात मृत्यूची नोंद करण्याचे काम सुरु होते. दरम्यान, गिरणा नदीत तो कसा बुडाला याबाबत घटना स्पष्ट झाली नाही.
