एलसीबीसह जिल्हापेठ पोलीस स्टेशनची संयुक्त कारवाई
जळगाव (प्रतिनिधी)- शहरातील गणेश कॉलनी भागात प्रोफेसर कॉलनी येथे कुंटणखाण्यावर एलसीबीसह जिल्हा पेठ पोलीस स्टेशनच्या पथकाने कारवाई केली आहे. यात एका बांग्लादेशी तरुणीची सुटका करून कुंटणखाना चालवणाऱ्या महिलेला अटक करण्यात आली आहे.
पूजा आत्माराम जाधव (वय २७, रा. प्रोफेसर कॉलनी, जळगाव) या महिलेला अटक करण्यात आली आहे. पोलीस अधीक्षक डॉ. महेश्वर रेड्डी यांनी स्थानिक गुन्हे अन्वेषण शाखेच्या पथकाला बोलावून प्रोफेसर कॉलनी येथे सुरू असलेल्या कुंटणखान्याविषयी चौकशी करून तेथे धाड टाकण्यास सांगितले. पोलीस अधीक्षकांकडे पुणे येथील एका सामाजिक संस्थेच्या सदस्यांनी येऊन तक्रार दिली आहे.(केसीएन)पोलीस अधीक्षकांच्या आदेशानुसार स्थानिक गुन्हे शाखेने जिल्हापेठ पोलीस स्टेशन येथे येऊन येथील पोलीस निरीक्षक प्रदीप ठाकूर यांच्या मार्गदर्शनाखाली दोन्ही पथकाने प्रोफेसर कॉलनी येथे जाऊन धाड टाकली. तेथे पूजा जाधव या महिलेने दरवाजा उघडला.
तेथे पोलिसांनी त्यांची ओळख दिली त्यानंतर घराची झाडाझडती घेतली असता तेथे एक २५ वर्षीय बांगलादेशी तरुणी आढळून आली. तात्काळ पोलिसांच्या पथकाने दोघांना ताब्यात घेतले. त्यानंतर चौकशी केली असता बांगलादेशी तरुणीने सांगितले की, नाशिक रेल्वे स्टेशन येथे दिनांक २३ जुलै रोजी हजर असताना संशयित पूजा जाधव या महिलेने, तुला जळगाव येथे चल….. नोकरी लावून देते असे सांगून जळगाव शहरात आणले. तेथे मात्र बळजबरीने देह व्यापार करण्यास सांगितला, असा जबाब बांगलादेशी रहिवासी तरुणीने पोलिसांना दिला आहे.
घटनास्थळी मुद्देमाल जप्त करून पोलिसांनी पंचनामा केला. याप्रकरणी पोलीस हेडकॉन्स्टेबल अश्विनी सावकारे यांच्या फिर्यादीवरून जिल्हापेठ पोलीस स्टेशन येथे गुन्हा दाखल करण्यात आला आहे. सदरची कारवाई पोलीस अधीक्षक डॉ. महेश्वर रेड्डी यांच्या मार्गदर्शनाखाली स्थानिक गुन्हे अन्वेषण शाखेचे पोलीस निरीक्षक संदीप पाटील, उपनिरीक्षक शरद बागल, अक्रम शेख, प्रवीण भालेराव, रवींद्र कापडणे, नितीन बाविस्कर यांच्यासोबत जिल्हापेठ पोलीस स्टेशनचे निरीक्षक प्रदीप ठाकूर, पोलीस हेड कॉन्स्टेबल भारती देशमुख आदींच्या पथकाने केली आहे.
