जळगाव रेल्वे पोलीस दलाची कारवाई
जळगाव (प्रतिनिधी) : जळगाव-सुरत रेल्वे लाइनवरील उभ्या मालगाडीच्या वॅगनचा दरवाजाचे सील तोडून चोरट्यांनी १२७ खताच्या बॅग लांबविल्याची तक्रार जळगाव रेल्वे स्थानकातील रेल्वे पोलिस दलाकडे २७ मार्च रोजी नोंदविण्यात आली. याप्रकरणी रेल्वे पोलिसांनी पिंपळकोठा येथून तीन आरोपींना अटक करीत ७५ पोती जप्त केली आहेत. याप्रकरणी जळगाव रेल्वे पोलिसांत नोंद करण्यात आली.
सुरत जळगाव रेल्वे लाइनवरील गुड शेडमध्ये दि. २६ मार्च रोजी मालगाडी उभी असताना एका वॅगनच्या दरवाजाचे सील उघडून चोरट्यांनी ७८ हजार ७४० रुपये किमतीची १२७ खताची पोती चोरून नेली.(केसीएन)त्यानंतर आरपीएफ पोलिस निरीक्षक ज्ञानेश्वर पाटील यांच्या मार्गदर्शनाखाली सहायक उपनिरीक्षक शिवपूजन सिंह, एस. बी. चौधरी, कॉन्स्टेबल पंकज वाघ, विनोद जेठवे यांनी तपास सुरू केला. तपासातून योगेश बडगुजर (वय ४६, रा. पिंपळकोठा, ता. एरंडोल) याची चौकशी केली असता १२७ खताची पोती दोन जणांच्या मदतीने चोरल्याची कबुली दिली. काही गोण्या विशाल पाटील, लीलाधर बडगुजर यांना विकल्या. याप्रकरणी योगेश बडगुजर, विशाल पाटील, लीलाधर बडगुजर यांना गुरुवार दि.३ रोजी अटक करून न्यायालयात हजर करण्यात आले. अन्य फरार दोन आरोपींचा तपास रेल्वे पोलिसांकडून सुरू आहे.
