मुंबई ( वृत्तसंस्था ) – अफगाणिस्तानमध्ये पाकटिका भागात बुधवारी पहाटे शक्तिशाली भूकंप झाला असून यामध्ये 1000 लोकांचा मृत्यू झाला आहे, तर 1500 हून अधिकजण जखमी झाले आहेत.
सोशल मीडियावर आलेल्या फोटोंमध्ये लोक स्ट्रेचरवर आणि ढिगाऱ्याखाली असल्याचं दिसत आहे. भूकंपाची तीव्रता रिश्टर स्केलवर 6.1 इतकी नोंदली गेल्याचं अमेरिकेच्या जिऑलॉजिकल सर्व्हेने म्हटलं आहे. जीवितहानीची संख्या वाढू शकतं असं स्थानिक प्रशासनाने बीबीसीशी बोलताना सांगितलं. खोस्ट नावाच्या शहरापासून साधारण 44 किलोमीटरच्या अंतरावर भूकंपाचा केंद्रबिंदू होता.
भूकंपाचे धक्के अफगाणिस्तानच्या बहुतांश भागांसह पाकिस्तान आणि भारतातही जाणवले असं युरोपियन मेडिटेरिअन सेसमोलॉजिकल सेंटरने म्हटलं आहे. अफगाणिस्तानची राजधानी काबूल तसंच पाकिस्तानचे राजधानी इस्लामाबादमध्येही भूकंपाचे धक्के जाणवले आहेत. काल रात्री पाकटिका प्रांतात चार जिल्ह्यांमध्ये शक्तिशाली भूकंप झाला आहे.