रावेर तालुक्यातील केऱ्हाळे बु. येथील घटना
रावेर (प्रतिनिधी) :- तालुक्यातील केऱ्हाळे बुद्रुक येथील नववीच्या विद्यार्थिनीने कुठल्यातरी नैराश्यात येऊन शनिवारी रात्री ८ वाजेच्या पूर्वी घरात गळफास घेऊन आत्महत्या केली. यामुळे एकच खळबळ उडाली असून तिच्या आत्महत्येच कारण अद्याप समजले नाही. दरम्यान, दररोज आत्महत्या वाढत असून आता किशोरवयीन मुलांचीही त्यात भर पडत असल्याने समाजमन चिंतीत झाले आहे.
नंदिनी दीपक महाजन (वय १५, रा. केऱ्हाळे बु. ता. रावेर) असे मयत विद्यार्थिनीचे नाव आहे. ती गावात तिची आईची आई अर्थात आजीसोबत राहत होती.
तिचा मामा एक वर्षांपूर्वी वारला आहे. तर आई लहानपणापासूनच विभक्त झाली असून वडील दीपक यांचे निधन झालेले आहे. ती केऱ्हाळे गावात दत्तू सोनजी माध्यमिक विद्यालयात इयत्ता नववीत शिकत होती. तिची आजी निर्मला भाजीपाला विक्री करून उदरनिर्वाह करून दोघांचे पोट भरत होती. शनिवारी आजी निर्मला महाजन बाहेरगावहून भाजीपाला विक्री करून रात्री ८ वाजता घरी परतल्यावर तिला दरवाजे बंद आढळले.
त्यांनी शेजारील घराच्या छतावरून जाऊन जिन्याद्वारे स्वतःच्या घरात प्रवेश केला. यावेळी नात नंदिनी हिने गळफास घेतल्याचे दिसले. तेव्हा तिने हंबरडा फोडला. शेजाऱ्यांनी नंदिनीला रुग्णालयात दाखल केले. रावेर पोलीस स्टेशनला अकस्मात मृत्यूची नोंद करण्यात आली असून तपास पोलीस उपनिरीक्षक तुषार करीत आहे. दरम्यान, नंदिनी हुशार होती. मनमिळावू, गोंडस मुलगी होती. मात्र तिने अचानक आत्महत्या करण्याचे कारण काय हा आता तपासाचा भाग आहे. गावात हळहळ व्यक्त होत आहे.
