जळगाव रेल्वेस्टेशन येथील घटना
जळगाव (प्रतिनिधी) : शहरातील रेल्वे स्टेशन रोडवरील दत्त मंदिराजवळ एकाला धारदार शस्त्राने वार करून गंभीर दुखापत केल्याची घटना बुधवार दि. १९ जून रोजी सकाळी १०.३० वाजता घडली आहे. याप्रकरणी शहर पोलीस ठाण्यात एकावर गुन्हा दाखल करण्यात आला.
अक्षय संजय अकोलकर (वय-२०, रा. मारुती मंदिर जवळ, शिवाजीनगर, जळगाव) हा तरुण महानगरपालिकेच्या कचरा गाडीवर काम करून उदरनिर्वाह करतो. बुधवारी दि. १९ जून रोजी सकाळी १०.३० वाजता अक्षय अकोलकर हा रेल्वेस्टेशन रोडवरील दत्त मंदिराजवळील नाश्ता करण्यासाठी आला होता. त्यावेळी त्याच्या ओळखीचा गजू उर्फ गजानन विलास बाविस्कर (रा. शिवाजीनगर) हा तिथे आला. त्याने अक्षयला ३०० रुपये मागितले. पैसे दे नाहीतर तुझ्या अंगावरील कोट दे असे सांगून अक्षयच्या अंगावरील कोट हिसकवण्याचा प्रयत्न करत असताना गजाननने धारदार शस्त्र काढून त्याच्यावर वार केले.
त्यामुळे त्याच्या पायाच्या मांडीला गंभीर दुखापत झाली आहे. जखमी झालेल्या अक्षयला तातडीने शासकीय वैद्यकीय महाविद्यालयात उपचारासाठी दाखल करण्यात आले. त्यानंतर त्याने शहर पोलीस ठाण्यात धाव घेऊन फिर्याद दिली. त्यानुसार दुपारी २ वाजता गजू उर्फ गजानन विलास बाविस्कर यांच्या विरोधात शहर पोलीस ठाण्यात गुन्हा दाखल करण्यात आला आहे. या घटनेचा पुढील तपास पोलीस हेड कॉन्स्टेबल किशोर निकुंभ हे करीत आहे.