भुसावळ तालुक्यातील गोजोरा येथील घटना
जळगाव (प्रतिनिधी) : भुसावळ तालुक्यातील गोजोरा येथे एका तरुणाला ४ ते ५ जणांनी घरातून शेतात बोलावून बेदम मारहाण करीत त्याचा खून केल्याची धक्कादायक घटना शुक्रवारी १६ फेब्रुवारी रोजी दुपारी १ रोजी घडली आहे. याप्रकरणी भुसावळ तालुका पोलीस स्टेशनला माहिती मिळाल्यानंतर त्यांनी घटनास्थळी धाव घेतली आहे. यामुळे भुसावळ तालुक्यात पुन्हा एकदा खळबळ उडाली आहे.
विनोद गंभीर कोळी (वय २७, रा. गोजोरा, ता. भुसावळ) हा तरुण त्याचे आई, वडील, २ भावांसह वास्तव्याला होता. शेतीकाम करून तो कुटुंबाचा उदरनिर्वाह करीत होता. विनोदचे वडील गंभीर कोळी यांनी सांगितले की, दोन दिवसांपूर्वी संशयित आरोपी जितू प्रभाकर डोळे, समा प्रभाकर डोळे यांनी विनोदला मारहाण केली होती. आज शुक्रवारीदेखील घरी विनोद एकटाच असल्याचे पाहून त्याला संशयित श्रावण सुपडू डोळे यांच्या मुलाने शेतात बोलावून घेतले.
शेतात संशयित श्रावण डोळे, जितू डोळे, समा डोळे यांच्यासह काही संशयितांनी त्याला बेदम मारहाण केली. त्यात तो गंभीर जखमी झाला. काही नागरिकांनी त्याला भुसावळ ट्रॉमा सेंटर येथे दाखल केले. तेथून जळगाव येथील शासकीय वैद्यकीय महाविद्यालय व रुग्णालय येथे हलविण्यात आले. जळगाव येथील शासकीय रुग्णालयात त्याला तपासून वैद्यकीय अधिकारी डॉ. सचिन पाटील यांनी मयत घोषित केले.
यानंतर कुटुंबीयांनी एकच आक्रोश केला. प्रसंगी भुसावळ तालुका पोलीस स्टेशनला माहिती मिळताच त्यांनी घटनास्थळी धाव घेतली. तर पोलीस अधिकारी अमोल पवार यांच्यासह अधिकाऱ्यांनी जळगाव रुग्णालयात येत कुटुंबियांकडून माहिती जाणून घेतली. भुसावळ तालुका पोलीस स्टेशनला खुनाचा गुन्हा दाखल करण्याची प्रक्रिया सुरु आहे. दरम्यान, भुसावळ तालुक्यात खून झाल्याने पुन्हा एकदा खळबळ उडाली आहे.
