सविस्तर वाचा, कुठे घडली घटना
अहमदनगर (प्रतिनिधी) : जामखेड तालुक्यातील साकत (हनुमान वस्ती) येथील तरुणाचे हृदयविकाराच्या झटक्याने शुक्रवारी दि. २४ रोजी सायंकाळी निधन झाले. विशेष म्हणजे त्याचे लग्न होऊन फक्त २२ दिवस झालेले होते. त्यामुळे जिल्ह्यात हळहळ व्यक्त होत आहे.
सुरज महादेव मिसाळ (वय २२) असे मयत तरुणाचे नाव आहे. सुरजच्या पाठीमागे आई, वडील, पत्नी, एक भाऊ व बहिण असा परिवार आहे. सुरज हा तरुण बीड जिल्ह्यातील पाटोदा येथे मामाबरोबर साईनाथ मेडिकल चालवत होता. मेडिकल दुकानामधुन घरी आल्यावर त्याच्या छातीत दुखू लागल्याने ताबडतोब त्यास जामखेड येथील खाजगी दवाखान्यात दाखल केले. पण डॉक्टरांनी मृत घोषित केले होते.
सुरजचे बावीस दिवसांपूर्वी म्हणजे दि. २ मे रोजी लग्न झाले होते. सुरजला बरे वाटत नाही म्हणून बीड येथील दवाखान्यात काही दिवस उपचार घेतले होते. बीड वरून आल्यावर बरे वाटल्याने शुक्रवारी तो मेडिकल मध्ये कामावर गेला होता. सायंकाळी घरी आल्यावर छातीत दुखू लागल्याने जामखेड येथील एका खासगी दवाखान्यात दाखल केले पण तोपर्यंत तो मयत झाला होता. नवविवाहित तरुणाच्या मृत्यूप्रकरणी जिल्ह्यात हळहळ व्यक्त करण्यात येत आहे.
