भडगाव तालुक्यातील वाक येथील घटना
भडगाव ( प्रतिनिधी ) – तालुक्यातील वाक येथे तरुणाला जुन्या वादातून तलवारीने मारहाण करण्याचा गंभीर प्रयत्न करण्यात आला. यामध्ये तरुणाच्या मानेला जखम झाली असून डाव्या हाताच्या मनगटाला गंभीर दुखापत झाली आहे. तसेच त्याचे कुटुंबीय मदतीसाठी धावले असता त्याचे वडील व काका यांनाही गंभीर मारहाण करण्यात आली आहे. भडगाव पोलीस स्टेशनला संशयित चौघांविरुद्ध गुन्हा दाखल करण्यात आला आहे.
राकेश सुधाकर पाटील (वय २८, रा. वाक ता. भडगाव) यांनी दिलेल्या फिर्यादीत म्हटले आहे की, दि. २ मे रोजी रात्री ११.३० वाजता आमचे गावातील योगेश कैलास पाटील, उमेश शालीक पाटील, सतिष शालीक पाटील, अक्षय बारकू पाटील असे इंडिका व्हिस्टा गाडी क्रमांक (एम. एच.४२ ए यु ४२४९) आले. त्यात वाहन योगेश हा चालवत होता. योगेश याने फिर्यादी राकेश पाटील याला त्याच्या वाहनाने ठोस मारली. तेव्हा सदर वाहनातून वरील चारही इसम खाली उतरले. उमेश शालीक पाटील याने मला मागुन धरुन ठेवले व योगेश कैलास पाटील याने वाहनांतून तलवार काढली व फिर्यादीच्या मानेवर उगारली. तेव्हा वार चुकवीला असता, सदर तलवारीचा वार फिर्यादी राकेश पाटील यांच्या मानेच्या डावे बाजुस लागला. त्यानंतर त्याने पुन्हा तलवार उगारली असता डाव्या हाताने तलवार धरण्यास गेलो असता, सदर तलवारीचा वार राकेश पाटील यांच्या हाताच्या मनगटास लागला.
तेव्हा फिर्यादीचे काका किशोर विक्रम पाटील व वडील सुधाकर विक्रम पाटील हे सोडविण्यास आले असता योगेश कैलास पाटील याने त्याच्या हातातील तलवारीने तरुणाचे काका किशोर पाटील यांच्या डोक्यावर वार केला. त्याचवेळी उमेश शालीक पाटील याने हातात लाकडी दांडकाने मारहाण केली. सदर भांडणात सतिष शालीक पाटील व अक्षय बारकू पाटील यांनी वेळोवेळी चिथावणी देवुन म्हणायचे की, यांना सोडु नका, कापुन टाका असे बोलून सतिष पाटील व अक्षय पाटील यांनी उमेश याचे हातातील लाकडी दांडका घेवून वडीलांना व काकांना मारहाण केली होती.
त्यानंतर तेथे फिर्यादीचे दुसरे काका सर्जेराव विक्रम पाटील, आई लिलाबाई सुधाकर पाटील, काकू जागृती किशोर पाटील, परमेस्वर सुधाकर पाटील अशांनी मारहाण करणा-या लोकांच्या तावडीतून सोडवले. वाहनातून बसवुन उपचारासाठी ग्रामीण रुग्णालय येथे आणत असतांना संशयित आरोपींनी त्यांचे वाहन अडवण्याचा प्रयत्न केला. योगेश कैलास पाटील, उमेश शालीक पाटील, सतिष शालीक पाटील, अक्षय बारकु पाटील सर्व रा.वाक ता.भडगाव यांच्याविरुद्ध गु.र.न.१६८/२०२५ अन्वये गुन्हा दाखल करण्यात आला आहे. पुढील तपास पो.हे.कॉ. संजय पाटील हे करीत आहे.
