तरुणांना रोजगार मार्गदर्शन
जळगाव ( प्रतिनिधी) – जागतिक महिला दिनाचे औचित्य साधून सुकर्मा प्रो व्हेंचर्स प्रायव्हेट लिमिटेड आणि सार्थक सिद्ध सेवा फाऊंडेशन, जळगाव यांच्या संयुक्त विद्यमाने भुसावळ तालुक्यातील वराडसिम येथे शेतमजूर महिलांचा सन्मान व रोजगार मार्गदर्शन कार्यक्रम उत्साहात पार पडला. केंद्रीय सामाजिक न्याय मंत्री रामदासजी आठवले यांचे स्वीय सहाय्यक हेमंतजी रणपिसे यांच्या मार्गदर्शनाखाली या कार्यक्रमाचे यशस्वी आयोजन करण्यात आले होते.
कार्यक्रमाच्या प्रमुख मार्गदर्शक म्हणून कंपनीच्या डायरेक्टर तथा फाऊंडेशनच्या संचालिका लक्ष्मीताई कुमावत उपस्थित होत्या. व्यासपीठावर वंदना पाटील, स्नेहा सोनवणे, विजया पांडे, कविता पाटील, सुरेखा तायडे यांची प्रमुख उपस्थिती लाभली. यासोबतच परिसरातील महिला, ग्रामपंचायत सदस्य आणि उपसरपंच यांनी मोठ्या संख्येने या सोहळ्यात सहभाग घेतला.
लक्ष्मीताई कुमावत यांनी उपस्थित महिलांना आर्थिक सक्षमतेचे धडे दिले. त्यांनी प्रामुख्याने विविध मुद्द्यांवर सखोल मार्गदर्शन केले. घरबसल्या कामाच्या संधी आणि स्वतःचा छोटा व्यवसाय कसा सुरू करावा. शासन आणि कंपनीच्या विविध कल्याणकारी योजनांची माहिती, भांडवल उभारणी, बाजारपेठेची निवड आणि व्यवसाय वाढवण्याचे तंत्र सांगण्यात आले.
कार्यक्रमाचे विशेष आकर्षण म्हणजे ऊन-पावसात राबणाऱ्या कष्टकरी शेतमजूर महिलांचा करण्यात आलेला सन्मान. मान्यवरांच्या हस्ते महिलांना शाल, पुष्पगुच्छ आणि मानचिन्ह देऊन गौरविण्यात आले. या सन्मानामुळे महिलांमध्ये आनंदाचे आणि उत्साहाचे वातावरण निर्माण झाले होते.
उपस्थित मान्यवरांनी महिलांना ‘आत्मनिर्भर’ होऊन स्वतःचे भविष्य घडवण्याचे आवाहन केले. कार्यक्रमाच्या शेवटी आयोजकांनी सर्व उपस्थितांचे आभार मानले.
