जिल्हा नियोजन सभागृहात एकदिवसीय कार्यशाळेचे आयोजन
जळगाव ( प्रतिनिधी ) :- जिल्ह्यात रस्ता सुरक्षेची व्याप्ती वाढवणे तसेच रस्ते अपघातांचे प्रमाण कमी करण्याच्या उद्देशाने जिल्हाधिकारी कार्यालयातील जिल्हा नियोजन सभागृहात आज रस्ता सुरक्षा प्रशिक्षण कार्यशाळा आयोजित करण्यात आली. जिल्हा प्रशासन आणि आयआयटी मद्रासच्या सेंटर ऑफ एक्सलन्स फॉर रोड सेफ्टी यांच्या संयुक्त विद्यमाने हा उपक्रम राबविण्यात आला. जिल्हाधिकारी रोहन घुगे यांच्या मार्गदर्शनाखाली ही कार्यशाळा पार पडली.
प्रशिक्षण सत्रात डॉ. रोशन जोश तसेच मुख्य प्रकल्प अधिकारी प्रदीप कुमार यांनी उपस्थितांना मार्गदर्शन केले. रस्ते सुरक्षेसंदर्भातील माहिती ऑनलाइन प्रणालीद्वारे नोंदविण्याची प्रक्रिया, अपघातप्रवण क्षेत्रांची ओळख पटविणे, त्यांचे नियमित सर्वेक्षण करणे आणि आवश्यक त्या उपाययोजना राबविणे याबाबत सविस्तर प्रात्यक्षिक देण्यात आले.
अपघातग्रस्त किंवा अपघातप्रवण भागांजवळ उपलब्ध असलेल्या वैद्यकीय सुविधा, मनुष्यबळ आणि आपत्कालीन साधनसामग्रीचे मूल्यमापन कसे करावे, याविषयीही सविस्तर माहिती देण्यात आली. अपघातानंतर तातडीने मदत पोहोचविण्यासाठी विविध विभागांमधील समन्वयाचे महत्त्व अधोरेखित करण्यात आले.
या प्रशिक्षण सत्राच्या प्रारंभी निवासी उपजिल्हाधिकारी वैशाली चव्हाण यांनी प्रास्ताविक केले. त्यांनी रस्ते अपघात कमी करण्यासाठी आवश्यक उपाययोजना, खबरदारी तसेच सर्व विभागांनी या प्रशिक्षणाचा लाभ घेण्याचे आवाहन केले.
कार्यक्रमास सार्वजनिक बांधकाम विभागाचे कार्यकारी अभियंता आर. डी. पाटील, जिल्हा आपत्ती व्यवस्थापन अधिकारी नरवीर रावळ, सहायक प्रादेशिक परिवहन अधिकारी सचिन बुरुड, नायब तहसीलदार रवींद्र उगले यांच्यासह पोलीस, परिवहन, आरोग्य, सार्वजनिक बांधकाम, राष्ट्रीय महामार्ग, महानगरपालिका व नगरपालिका विभागांचे अधिकारी व कर्मचारी उपस्थित होते
आधुनिक तंत्रज्ञान, माहिती व्यवस्थापन आणि प्रतिबंधात्मक उपाययोजनांचा प्रभावी वापर करून जिल्ह्यातील रस्ते अपघातांचे प्रमाण कमी करण्यासाठी हे प्रशिक्षण उपयुक्त ठरणार असल्याचे यावेळी सांगण्यात आले.
कार्यशाळेच्या शेवटी कार्यकारी अभियंता आर. डी. पाटील यांनी उपस्थितांचे आभार मानले.
“अपघातांचे प्रमाण कमी करण्यासाठी सर्व विभागांनी समन्वयाने काम करणे आवश्यक आहे. या प्रशिक्षणातून मिळालेली माहिती प्रत्यक्ष अंमलबजावणीत आणल्यास जिल्ह्यातील जीवितहानी कमी करण्यास मोठी मदत होईल.”
— आर. डी. पाटील, कार्यकारी अभियंता, सार्वजनिक बांधकाम विभाग, जळगाव
