जळगाव ( प्रतिनिधी ) :- शहरातील मेहरूण भागातील दत्त नगर येथून एका १६ वर्षे ७ महिने वय असलेल्या अल्पवयीन मुलाला अज्ञात इसमाने काहीतरी आमिष दाखवून फुसलावून पळवून नेल्याची धक्कादायक घटना समोर आली आहे. याप्रकरणी एमआयडीसी पोलीस ठाण्यात अज्ञात व्यक्तीविरुद्ध अपहरणाचा गुन्हा दाखल करण्यात आला आहे.
पोलीस सूत्रांकडून मिळालेल्या माहितीनुसार, सलमान रहेमान खाटीक (वय ४०, व्यवसाय- मजुरी, रा. दत्त नगर, मेहरूण, जळगाव) यांनी या प्रकरणी एमआयडीसी पोलीस ठाण्यात फिर्याद दिली आहे. २१ जून २०२६ रोजी रात्री ८.३० वाजेच्या सुमारास त्यांचा १७ वर्षीय मुलगा साहिल सलमान खाटीक (वय १६ वर्षे ७ महिने) हा दत्त नगर येथील राहत्या घरातून अचानक गायब झाला.
कुटुंबीयांनी त्याचा सर्वत्र शोध घेतला, मात्र तो मिळून आला नाही. कोण्यातरी अज्ञात इसमाने साहिल याला कशाचे तरी आमिष दाखवले व फूस लावून त्याला पळवून नेल्याची खात्री पटल्यानंतर वडिलांनी पोलिसांत धाव घेतली.
पीडित मुलाच्या वडिलांच्या तक्रारीवरून २२ जून २०२६ रोजी दुपारी १३.१४ वाजता एमआयडीसी पोलीस ठाण्यात अज्ञात इसमाविरुद्ध भारतीय न्याय संहिता (BNS) २०२३ चे कलम १३7(२) अन्वये गुन्हा रजिस्टर क्रमांक ५६०/२०२६ नुसार गुन्हा दाखल करण्यात आला आहे.
या गुन्ह्याचा पुढील तपास पोलीस उपनिरीक्षक अशोक कोळे करत आहे.
