भाजपची यादी गुरुवारी : सेनेच्या यादीत जळगावचे प्रतापराव पाटील ?
जळगाव (प्रतिनिधी) : आगामी विधानपरिषद निवडणुकीच्यानिमित्ताने महाराष्ट्रातील राजकारणात रंगत निर्माण झाली आहे. विधान परिषदेच्या ९ जागांसाठी येत्या १२ मे रोजी निवडणूक होणार आहे. या ९ जागांपैकी भाजपच्या वाट्याला पाच जागा येणार आहेत. तर शिवसेना शिंदे गटाकडे २, राष्ट्रवादी अजित पवार गटाकडे १ व उद्धवसेनेकडे १ जागा आहे. यात सेनेच्या कोट्यात एकनाथ शिंदेंच्या आदेशाने जळगावातून प्रतापराव पाटील यांचे नाव येण्याची शक्यता राजकीय वर्तुळात वर्तवली जात आहे.
काही दिवसांपूर्वी महाराष्ट्रातील भाजपच्या कोअर कमिटीने तब्बल ३० जणांच्या नावांची यादी दिल्लीतील पक्षश्रेष्ठींकडे पाठवली होती. मात्र, ही यादी पाहिल्यानंतर दिल्लीतील वरिष्ठांनी या यादीमधील अर्धी नावे काढून पुन्हा सुधारित यादी पाठवण्यास सांगितले होते. त्यानुसार आता महाराष्ट्र भाजपने विधानपरिषद निवडणुकीसाठी १४ जणांच्या नावांची सुधारित यादी पुन्हा दिल्लीला पाठवली आहे.
विधानपरिषद निवडणुकीत उमेदवारी मिळावी, यासाठी भाजपमध्ये सध्या प्रचंड रस्सीखेच सुरु आहे. खबरदारीचा उपाय म्हणून भाजपने आता उमेदवारी अर्ज भरण्याच्या शेवटच्या दिवशी म्हणजे ३० एप्रिललाच उमेदवारी यादी जाहीर करण्याचा निर्णय घेतला आहे. सूत्रांच्या माहितीनुसार, विधानपरिषदेसाठी मुंबई वगळता राज्यातील पाच विभागांमधून संधी दिली जाणार आहे. पक्षातील जुन्या आणि सर्वसामान्य कार्यकर्त्यांना संधी मिळणार असल्याची सूत्रांची माहिती आहे.
दरम्यान, विधानपरिषदेसाठीच्या १४ उमेदवारांची नावे दिल्लीला पाठवल्यानंतर स्वत: प्रदेशाध्यक्ष रवींद्र चव्हाण हेदेखील दिल्लीला रवाना झाले आहेत. आता दिल्लीत भाजपच्या केंद्रीय नेत्यांशी चर्चा करुन ५ उमेदवारांची नावं निश्चित करतील. पुढील काही तासांमध्ये भाजपची विधानपरिषद उमेदवारांची यादी अंतिम होण्याची शक्यता आहे.
भाजपचे विधानपरिषद निवडणुकीतील संभाव्य उमेदवार कोण?
भाजपने लोकसभा आणि विधानसभा निवडणूकीत पराभूत झालेल्यांना विधानपरिषदेवर संधी द्यायची नाही, असे धोरण स्वीकारल्याची माहिती आहे. याउलट संघटनेत काम करणाऱ्या नव्या चेहऱ्यांना आणि जातीय समीकरणे साधणाऱ्या उमेदवारांना संधी देण्याचे भाजपने घेतला होता. त्यानुसार, माधवी नाईक, डॉ. उपेंद्र कोठेकर, मनोज कोटक, केशव उपाध्ये, रवी अनासपुरे, राजेश पांडे, दयाशंकर तिवारी, राम सातपुते, रणजितसिंह निंबाळकर, संजय काका पाटील, विवेक कोल्हे, जगदीश मुळीक, प्रमोद जठार, संजय केणेकर, अर्चना पाटील चाकूरकर, दादाराव केचे, संजय भेंडे यांची नावं उमेदवारीच्या शर्यतीत आहेत.
