शामकांत सोनवणे, लक्ष्मण पाटील यांच्यासह १२ संचालक सहलीला
जळगाव ( प्रतिनिधी ) : जळगाव कृषी उत्पन्न बाजार समितीच्या राजकारणात मोठी खळबळ उडाली आहे. ज्या पद्धतीने सुनील महाजन यांनी अवघ्या आठ महिन्यांपूर्वी राजकीय खेळी करत श्यामकांत सोनवणे यांना सभापती पदावरून खाली खेचले होते, त्याच पद्धतीने आता महाजन यांच्याविरुद्ध अविश्वास ठराव दाखल करण्यात आला आहे. यामुळे महाजन यांची खुर्ची धोक्यात आली असून बाजार समितीच्या राजकारणाला पुन्हा एकदा कलाटणी मिळाली आहे.
सोमवारी बाजार समितीच्या १८ पैकी १२ संचालकांनी जिल्हाधिकारी रोहन घुगे यांच्याकडे सभापती सुनील महाजन यांच्याविरोधात अविश्वासाचा प्रस्ताव सादर केला. विशेष म्हणजे, या १२ संचालकांमध्ये सभापतींचे अत्यंत जवळचे मानले जाणारे संचालक देखील सहलीवर गेल्याची माहिती समोर आली आहे.
२९ ऑगस्ट २०२५ रोजी श्यामकांत सोनवणे यांना पायउतार करून सुनील महाजन सभापती झाले होते. मात्र, अवघ्या ८ महिन्यांच्या कालावधीतच त्यांच्यावर ही वेळ आली आहे.
पुढील प्रक्रिया आणि राजकीय समीकरणे
विशेष सभा: अविश्वास प्रस्ताव सादर झाल्यानंतर आता जिल्हाधिकाऱ्यांच्या भूमिकेकडे सर्वांचे लक्ष लागले आहे. नियमानुसार, जिल्हाधिकारी आता यावर निर्णय घेण्यासाठी बाजार समितीची विशेष सभा बोलवतील. सुनील महाजन यांना आपले पद टिकवण्यासाठी सभेत बहुमत सिद्ध करावे लागेल. जर १२ संचालकांनी आपली भूमिका कायम ठेवली, तर महाजन यांना सभापती पदाचा राजीनामा द्यावा लागेल.
सहलीला गेलेल्या संचालकांमध्ये शामकांत सोनवणे, लक्ष्मण पाटील, मनोज दयाराम चौधरी, पल्लवी देशमुख आदींचा समावेश आहे.
