आई-वडील आणि सासरच्या मंडळींसह पतीवर पोक्सो अंतर्गत गुन्हा दाखल
पारोळा(प्रतिनिधी):- अल्पवयीन असल्याचे माहीत असतानाही मुलीचा बालविवाह लावून दिल्याची आणि त्यानंतर अत्याचार झाल्याची धक्कादायक घटना पारोळा तालुक्यात उघडकीस आली आहे. याप्रकरणी पीडित विवाहितेने दिलेल्या फिर्यादीवरून तिचे आई-वडील, सासू-सासरे आणि पती अशा एकूण ५ जणांविरुद्ध पारोळा पोलीस ठाण्यात गंभीर कलमान्वये गुन्हा दाखल करण्यात आला आहे.
पीडित मुलीचा जन्म १ जून २००९ रोजी झालेला आहे. ती अल्पवयीन असल्याचे माहीत असतानाही, सन २०२१ किंवा २०२२ मध्ये तिचे आई-वडील रा. भडगाव) यांनी तिचा विवाह भूषण धर्मा जोगी (रा. पारोळा) याच्याशी लावून दिला.
विवाहानंतर पीडिता सासरी राहत असताना, ती अल्पवयीन आहे हे माहीत असूनही पती भूषण जोगी याने तिच्याशी शरीरसंबंध ठेवले. यातून पीडितेने यापूर्वी दोन मुलांना जन्म दिला आहे. बालविवाह आणि त्यानंतर झालेल्या लैंगिक अत्याचारामुळे पीडितेचे शारीरिक व मानसिक शोषण झाल्याचे फिर्यादीत म्हटले आहे.
यांच्यावर झाला गुन्हा दाखल
१) सकूबाई निंबा सोनवणे (आई)
२) निंबा भिमराव सोनवणे (वडील)
३) पार्वती धर्मा जोगी (सासू)
४) धर्मा गोरख जोगी (सासरे)
५) भूषण धर्मा जोगी (पती)
हा गुन्हा सुरुवातीला मनमाड पोलीस ठाण्यात शून्य क्रमांकाने दाखल झाला होता, त्यानंतर तो तपासासाठी पारोळा पोलीस ठाण्यात वर्ग करण्यात आला आहे. पारोळा पोलीस ठाण्याचे पोलीस निरीक्षक अशोक पवार यांच्या मार्गदर्शनाखाली गुन्हा नोंदवण्यात आला आहे. पुढील तपास पोलीस उपनिरीक्षक अमोल दुकळे करत आहेत. या घटनेमुळे जिल्ह्यात बालविवाहाच्या प्रथेबाबत पुन्हा एकदा खळबळ उडाली आहे.
