परिचय पत्र लेखन व मुलाखत तंत्रावर उत्तर महाराष्ट्र विद्यापीठात कार्यशाळा

जळगाव, (प्रतिनिधी) : कवयित्री बहिणाबाई चौधरी उत्तर महाराष्ट्र विद्यापीठाच्या केंद्रीय प्रशिक्षण व नियुक्ती कक्षामार्फत संगणक शास्त्र प्रशाळेच्या सेमिनार हॉलमध्ये “परिचय पत्र लेखन व मुलाखत तंत्र (Resume Writing & Interview Techniques)” या विषयावर एकदिवसीय कार्यशाळेचे आयोजन करण्यात आले. कार्यशाळेत एमसीए, एम.एस्सी. कॉम्प्युटर सायन्स आणि एम.एस्सी. आयटी विभागातील १०८ विद्यार्थ्यांनी उत्स्फूर्त सहभाग नोंदविला.

रोजगारक्षम कौशल्यांवर भर

कार्यशाळेच्या प्रमुख मार्गदर्शक म्हणून कम्युनिकेशन अँड मॅनेजमेंट विषयाच्या प्रशिक्षक डॉ. सुमित्रा चव्हाण उपस्थित होत्या. त्यांनी विद्यार्थ्यांना प्रभावी परिचयपत्र तयार करण्याचे महत्त्व, रोजगारक्षम कौशल्यांचा विकास तसेच कॅम्पस मुलाखतींसाठी आत्मविश्वासाने तयारी करण्याबाबत सविस्तर मार्गदर्शन केले.

एटीएस अनुकूल रिझ्युमेपासून मुलाखतीतील संवाद कौशल्यापर्यंत मार्गदर्शन

यावेळी त्यांनी व्यावसायिक परिचयपत्राचा उद्देश, एटीएस (ATS) अनुकूल रिझ्युमे तयार करण्याची पद्धत, रिझ्युमेतील सामान्य चुका टाळण्याचे उपाय, एचआर मुलाखतीतील संभाव्य प्रश्नांना प्रभावी उत्तरे देण्याची तंत्रे तसेच मुलाखतीदरम्यान आवश्यक असलेल्या व्यावसायिक संवाद कौशल्याचे महत्त्व विद्यार्थ्यांना समजावून सांगितले.

कार्यक्रमाच्या अध्यक्षस्थानी एमसीए विभागाचे विभागप्रमुख व प्लेसमेंट समन्वयक प्रा. अजय पाटील होते. कार्यक्रमाचे सूत्रसंचालन प्लेसमेंट अधिकारी सोनाली दायमा यांनी केले. केंद्रीय प्रशिक्षण व नियुक्ती कक्षाचे समन्वयक प्रा. उज्ज्वल पाटील यांच्या मार्गदर्शनाखाली ही कार्यशाळा यशस्वीपणे पार पडली. इंटर्नशिप समन्वयक श्री. संदीप कुमार तसेच केंद्रीय प्रशिक्षण व नियुक्ती कक्षाच्या सर्व सहकाऱ्यांनी आयोजनासाठी विशेष परिश्रम घेतले.

“आजच्या स्पर्धात्मक रोजगार क्षेत्रात प्रभावी परिचयपत्र आणि आत्मविश्वासपूर्ण मुलाखत कौशल्य ही यशाची गुरुकिल्ली असून विद्यार्थ्यांनी या कौशल्यांचा सातत्याने विकास करावा.” — डॉ. सुमित्रा चव्हाण