२ लाख ४० हजारांचा ऐवज लंपास ; भडगाव-पाचोरा रस्त्यावरील घटना
पाचोरा (प्रतिनिधी):- शहरातील भडगाव-पाचोरा रस्त्यावरील जय भवानी मॉलजवळ शुक्रवारी (१५ मे) रात्री ९:४५ वाजेच्या सुमारास एक धक्कादायक घटना घडली. रस्त्यावरील पथदिवे बंद असल्याचा फायदा घेत एका अज्ञात चोरट्याने पायी चालत जाणाऱ्या शिक्षिकेच्या गळ्यातील २ लाख ४० हजार रुपये किमतीची २० ग्रॅम वजनाची सोन्याची मिनी पोत जबरदस्तीने हिसकावून पळवून नेली. या प्रकरणी पाचोरा पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, चिंतामणी कॉलनी येथील रहिवासी आणि व्यवसायाने शिक्षिका असलेल्या वैशाली योगेश मोरे (वय ४६) या त्यांची बहीण रेखा भीमराव चव्हाण यांच्यासह घरगुती सामान खरेदी करण्यासाठी भडगाव रोडवरील जय भवानी मॉल येथे गेल्या होत्या. रात्री पाऊण वाजेच्या सुमारास खरेदी करून त्या दोन्ही भगिनी पायी घराकडे परतत होत्या.
ज्यावेळी ही घटना घडली, त्यावेळी परिसरातील रस्त्यावरील वीज पुरवठा किंवा पथदिवे बंद असल्याने सर्वत्र अंधार होता. याचाच फायदा घेत एका साधारण ४० वर्षे वयाच्या, मजबूत शरीरयष्टीच्या अज्ञात इसमाने महिलांच्या नकळत मागून येऊन गराडा घातला. काही समजण्याच्या आतच त्याने वैशाली मोरे यांच्या गळ्यातील सोन्याची पोत जोरात हिसकावून पळ काढला.
पोत गळ्यातून ओढल्याचे लक्षात येताच दोन्ही महिलांनी “चोर-चोर” असा आरडाओरडा केला आणि चोरट्याच्या पाठीमागे धाव घेतली. मात्र, अंधार असल्यामुळे आजूबाजूचे नागरिक जमा होण्यापूर्वीच, चोरट्याने काही अंतरावर उभी करून ठेवलेली आपली मोटरसायकल स्टार्ट केली आणि तो वेगाने अंधाराचा फायदा घेऊन पसार झाला.
घटनेची माहिती मिळताच पाचोरा विभागाचे उपविभागीय पोलीस अधिकारी (SDPO) श्री. बापू रोहम आणि भडगाव पोलीस ठाण्याचे प्रभारी सहाय्यक पोलीस निरीक्षक प्रदीप एकशिंगे यांनी रात्रीच घटनास्थळी धाव घेतली आणि परिसराची पाहणी केली.
या संदर्भात वैशाली मोरे यांच्या फिर्यादीवरून पाचोरा पोलीस स्टेशनमध्ये अज्ञात चोरट्याविरुद्ध भारतीय न्याय संहितेच्या (BNS) कलम ३०४(२) अन्वये गुन्हा दाखल करण्यात आला आहे. या घटनेचा पुढील तपास पोलीस उपनिरीक्षक कृष्णा घायळ करत आहेत. शहरात भररस्त्यात महिला सुरक्षित नसल्याने नागरिकांमधून आणि विशेषतः महिला वर्गातून तीव्र संताप व्यक्त होत असून, बंद पथदिव्यांबाबतही रोष निर्माण झाला आहे.
