डीपीडीसीकडून १५.५० कोटींचा निधी; ७१ अंगणवाड्या अजूनही भाड्याच्या इमारतीत
जळगाव (प्रतिनिधी):- जिल्ह्यातील चिमुकल्यांसाठी आनंदाची बातमी असून, नव्याने १०५ अंगणवाड्यांच्या इमारती उभारण्यास गती मिळाली आहे. जिल्हा नियोजन व विकास समितीच्या (डीपीडीसी) निधीतून या अंगणवाड्यांची उभारणी करण्यात येणार असून त्यासाठी तब्बल १५ कोटी ५० लाख रुपयांचा निधी उपलब्ध झाला आहे. यातील ७६ अंगणवाड्यांच्या बांधकामांचे कार्यादेश देण्यात आले असून कामांना प्रत्यक्ष सुरुवात झाली आहे.
जिल्हा परिषदेच्या मुख्य कार्यकारी अधिकारी करिश्मा नायर यांनी या कामांचा आढावा घेत ४८ अंगणवाड्यांची कामे मार्चअखेर पूर्ण करण्याचे आदेश दिले आहेत. तर उर्वरित ५७ अंगणवाड्यांची कामे जानेवारीपर्यंत पूर्ण करण्याचे निर्देश संबंधित यंत्रणांना देण्यात आले आहेत.
जिल्ह्यात सध्या ३ हजार ६०० हून अधिक अंगणवाड्या कार्यरत आहेत. त्यापैकी सुमारे ३ हजार ४०० अंगणवाड्यांना स्वतःची इमारत उपलब्ध आहे. मात्र अजूनही ७१ अंगणवाड्या शाळा, ग्रामपंचायतीच्या जागा किंवा भाड्याच्या खोल्यांमध्ये भरविल्या जात आहेत. त्यामुळे या अंगणवाड्यांना स्वतंत्र व सुरक्षित इमारती मिळाव्यात यासाठी प्रशासनाने विशेष प्रयत्न सुरू केले आहेत.
एका अंगणवाडीच्या बांधकामासाठी साधारण ११ लाख २५ हजार रुपये खर्च येत असून आदिवासी भागातील अंगणवाड्यांसाठी १२ लाख ३० हजार रुपयांपर्यंत निधी मंजूर केला जात आहे. यापूर्वी प्रति अंगणवाडी केवळ ८ लाख ५० हजार रुपये निधी मिळत होता. मात्र डीपीडीसीने वाढीव निधी दिल्याने आता अधिक दर्जेदार बांधकाम शक्य होणार आहे.
२०२५-२६ च्या नियोजनातून डीपीडीसीने सुरुवातीला ९ कोटी ९९ लाख रुपयांचा निधी मंजूर केला होता. त्यानंतर पुनर्नियोजनातून आणखी ५.५० कोटी रुपये उपलब्ध झाल्याने कामांना अधिक गती मिळणार आहे.
दरम्यान, उर्वरित ७१ अंगणवाड्यांसाठी सुमारे ८ कोटी रुपयांच्या निधीची आवश्यकता असल्याचे महिला व बालकल्याण विभागाचे जिल्हा कार्यक्रम अधिकारी हेमंतकुमार भदाणे यांनी सांगितले. आगामी २०२६-२७ च्या नियोजनात यासाठी विशेष तरतूद करण्याबरोबरच काही जुन्या अंगणवाड्यांच्या दुरुस्तीची कामेदेखील हाती घेतली जाणार असल्याचे त्यांनी स्पष्ट केले.
