बंदुकीचा धाक दाखवत रोख रक्कम लुटली; एक आरोपी अटकेत, दोन साथीदारांचा शोध सुरू
पाचोरा (प्रतिनिधी) – पाचोरा तालुक्यातील शक्तिधाम परिसरात बनावट पार्सल देण्याच्या बहाण्याने घरात प्रवेश करून बंदुकीसारख्या वस्तूचा धाक दाखवत रोख रक्कम लुटल्याची धक्कादायक घटना घडली आहे. या प्रकरणी पाचोरा पोलिसांनी तातडीने कारवाई करत एका संशयित आरोपीला अटक केली असून त्याच्या दोन साथीदारांचा शोध सुरू आहे.
पोलिसांकडून मिळालेल्या माहितीनुसार, १२ जून रोजी दुपारी साडेतीन वाजेच्या सुमारास शक्तिधामजवळील लक्ष्मी आंगण कॉलनी परिसरात ही घटना घडली. फिर्यादी कुसुम एकनाथ मोकळे (वय ४२, रा. सातगाव डोंगरी, ता. पाचोरा) यांच्या घरी एक युवक बॅग घेऊन आला. त्याने “तुमचे अमेझॉनचे पार्सल आले आहे” असे सांगून घरात प्रवेश केला.
घरात गेल्यानंतर त्याने बॅगेतून बंदुकीसारखी दिसणारी वस्तू काढून घरातील सदस्यांना धमकावले. त्यानंतर आणखी दोन साथीदार घरात आले. तिघांनी मिळून कुटुंबीयांना एका ठिकाणी बसवून घरातील सोन्याचे दागिने व पैसे कुठे आहेत याची विचारणा केली.
घरातील सर्व कपाटे आणि सामानाची उलथापालथ केल्यानंतर आरोपींनी कपाटातील पाकिटात ठेवलेली सुमारे ७ हजार ५०० रुपयांची रोख रक्कम तसेच फिर्यादींच्या मुलाच्या शालेय बॅगेतील ७०० रुपये काढून घेतले. त्यानंतर तिघेही घटनास्थळावरून पसार झाले.
सीसीटीव्ही व संशयावरून आरोपीची ओळख
घटनेनंतर फिर्यादींनी दिलेल्या माहितीनुसार, हेल्मेट घातलेल्या आरोपींपैकी एक जण सातगाव परिसरातील चेतन उर्फ जितू भुतेकर असल्याचा संशय व्यक्त करण्यात आला. पोलिसांनी तत्काळ तपास सुरू करून संशयित चेतन उर्फ जितू भुतेकर याला अटक केली.
गुन्हा दाखल; पुढील तपास सुरू
या प्रकरणी पाचोरा पोलीस ठाण्यात भारतीय न्याय संहितेच्या कलम ३०९(४) अन्वये जबरी चोरीचा गुन्हा दाखल करण्यात आला आहे. अटक करण्यात आलेल्या आरोपीची चौकशी सुरू असून फरार दोन साथीदारांचा शोध पोलीस घेत आहेत.
या धाडसी चोरीच्या घटनेमुळे शक्तिधाम व परिसरातील नागरिकांमध्ये भीतीचे वातावरण निर्माण झाले असून पोलिसांनी नागरिकांना अनोळखी व्यक्तींना घरात प्रवेश देताना खबरदारी घेण्याचे आवाहन केले आहे.
