पाचोरा येथे जुन्या वादातून दोन गटात तुफान हाणामारी; लोखंडी रॉड अन् चाकूने हल्ला
बिस्मिल्ला नगरातील घटना; चौघांविरुद्ध पाचोरा पोलिसांत गुन्हा दाखल
पाचोरा (जि. जळगाव):
जुन्या वादाची कुसळ मनात धरून एका कुटुंबातील सदस्यांवर लोखंडी रॉड व चाकूने प्राणघातक हल्ला चढवल्याची धक्कादायक घटना पाचोरा शहरातील बिस्मिल्ला नगरात घडली आहे. या हल्ल्यात दोन जण गंभीर जखमी झाले असून, पाचोरा पोलीस ठाण्यात चौघांविरुद्ध गुन्हा दाखल करण्यात आला आहे.
मिळालेल्या माहितीनुसार, बिस्मिल्ला नगरात राहणारे फळ विक्रेते हुजेबा शाकीर बागवान (वय २२) हे शुक्रवारी (७ ऑगस्ट) सायंकाळी ४:१२ वाजेच्या सुमारास आपल्या घरासमोरील अंगणात असताना, मुल्ला वाडा येथील चार जणांचे टोळके तेथे आले. जुन्या वादाचे कारण उकरून काढत संशयित रिजवान बाशीद देशमुख, अब्दुल रहीम उर्फ टिपू बाशीद देशमुख, मुसेफ हमीद देशमुख आणि अजिम नथ्थुमिया देशमुख (सर्व रा. मुल्ला वाडा, पाचोरा) यांनी हुजेबा बागवान, त्यांचे वडील व भावाला बेछूट शिवीगाळ करत चापटबुक्क्यांनी मारहाण करण्यास सुरुवात केली.
भांडण सोडवण्यासाठी व बचाव करण्यासाठी मध्यस्थी आलेल्यांवर संशयितांनी शस्त्रांचा वापर केला. यात आरोपी रिजवान देशमुख याने त्याच्याजवळील लोखंडी रॉडने हुजेबा यांच्या हातावर जोरात मारून त्यांना गंभीर दुखापत केली. याच वेळी संशयित अब्दुल रहीम उर्फ टिपू देशमुख याने त्याच्या हातातील चाकूने हुजेबा यांचे मामेभाऊ शोहेब सलाम बागवान यांच्या हाताच्या बोटावर वार करून रक्तबंबाळ केले.
या घटनेमुळे परिसरात भीतीचे वातावरण पसरले. जखमींवर तात्काळ वैद्यकीय उपचार करण्यात आले. त्यानंतर हुजेबा बागवान यांनी पाचोरा पोलीस ठाण्यात तक्रार नोंदवली. त्यांच्या फिर्यादीवरून चौघा संशयितांविरुद्ध भारतीय न्याय संहिता (BNS) २०२३ चे कलम ११८(२) (घातक शस्त्राने गंभीर दुखापत करणे), ११५(२), ३५१(२), ३५२ व ३(५) अन्वये गुन्हा दाखल करण्यात आला आहे.
घटनेची माहिती मिळताच पाचोरा पोलीस ठाण्याचे पोलीस निरीक्षक राहुलकुमार पवार यांनी घटनास्थळी भेट देऊन परिस्थितीची पाहणी केली. या प्रकरणाचा पुढील तपास पोलीस हवालदार तुषार विसपुते करत आहेत.
