निंभोरा (प्रतिनिधी) :- रस्त्याच्या परिस्थितीकडे दुर्लक्ष करून भरधाव वेगाने कार चालवत ट्रॅक्टरला मागून जोरदार धडक दिल्याची घटना रावेर तालुक्यातील वडगाव फाट्याजवळ घडली. या अपघातात ट्रॅक्टरच्या ट्रॉलीमध्ये बसलेले राजेंद्र पाटील व मयूर पाटील हे दोघे गंभीर जखमी झाले आहेत. याप्रकरणी कारचालकाविरुद्ध निंभोरा पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, ७ ऑक्टोबर २०२६ रोजी सकाळी सुमारे ५.४५ वाजता हा अपघात घडला. फिर्यादी महेंद्र गजानन पाटील (वय २४, व्यवसाय शिक्षण, रा. गरताड, ता. चोपडा, जि. जळगाव) हे साक्षीदारांसह ट्रॅक्टरवरून बुऱ्हाणपूर येथून दुर्गादेवीची मूर्ती घेऊन आपल्या मूळ गावी गरताड येथे जात होते.
दरम्यान, रावेरकडून सावदा दिशेने जाणाऱ्या रस्त्यावर वडगाव फाट्याजवळ चारचाकी सिल्व्हर-गोल्ड रंगाची ह्युंदाई i10 कार क्रमांक MH-26 V 4423 आली. कारचालक अजीम तैय्यब सय्यद (वय २३, रा. गारखेडा परिसर, धरतीधन सोसायटी, इंदिरा नगर क्रांती चौक, जिल्हा संभाजीनगर) याने वाहन रस्त्याच्या परिस्थितीकडे दुर्लक्ष करून भरधाव व निष्काळजीपणे चालविले.
यावेळी कारने दुर्गादेवीची मूर्ती असलेल्या ट्रॅक्टरला जोडलेल्या ट्रॉलीला पाठीमागून जोरदार धडक दिली. या धडकेत ट्रॉलीमध्ये बसलेले राजेंद्र पाटील व मयूर पाटील यांना गंभीर दुखापत झाली.
घटनेनंतर जखमींना उपचारासाठी रुग्णालयात दाखल करण्यात आले. या प्रकरणी फिर्यादीच्या तक्रारीवरून निंभोरा पोलिस ठाण्यात गुन्हा रजिस्टर क्रमांक 210/2026 अन्वये भारतीय न्याय संहिता कलम 281, 125(अ), 125(ब) तसेच मोटार वाहन कायदा कलम 184 प्रमाणे गुन्हा दाखल करण्यात आला आहे.
या घटनेचा पुढील तपास पोहेकॉ./1195 सतीश सानप, निंभोरा पोलिस ठाणे करीत आहेत. प्रकरणातील आरोपी अजीम तैय्यब सय्यद यास अद्याप अटक करण्यात आलेली नाही.
