भाजप आमदारांच्या मतदारसंघात कमी तर काँग्रेस आमदारांच्या मतदारसंघात सर्वाधिक मतदान
जळगाव (प्रतिनिधी) : जळगाव आणि रावेर लोकसभा मतदारसंघातील अंतिम मतदान टक्केवारी प्राप्त झाली आहे. त्यानुसार जळगाव लोकसभा मतदारसंघात एकण सरासरी ५७.७०% तसेच रावेर मतदारसंघात एकूण सरासरी ६३.०१ टक्के मतदान झाल्याची नोंद झाली आहे. विधानसभानुसार लक्षात घेता भाजप आमदारांच्या मतदार संघातील मतदानाची टक्केवारी कमी झाली असून शिवसेना शिंदे गटाच्या आमदारांच्या मतदारसंघात समाधानकारक स्थिती आहे. काँग्रेस आमदारांच्या मतदारसंघात मतदानाची सर्वाधिक टक्केवारी आहे.
जळगाव व रावेर दोन्ही लोकसभा मतदारसंघांमध्ये सोमवारी दि.१३ मे रोजी मतदान घेण्यात आले. मतदानामध्ये सकाळच्या प्रहरात नागरिकांचा मोठा उत्साह दिसला. नंतर दुपारून चार वाजेनंतर गर्दी उसळलेली दिसून आली. प्रशासनाकडून स्वतः जिल्हाधिकाऱ्यांसह अनेक अधिकारी हे मतदानाचा टक्का वाढावा यासाठी सातत्याने नागरिकांना आवाहन करीत होते. जिल्हा प्रशासनाकडून मतदानाची आकडेवारी समोर आली आहे. यामध्ये जळगाव लोकसभा मतदारसंघात १९ लाख ९४ हजार ४६ मतदारांपैकी ११ लाख ५० हजार ५३६ मतदारांनी आपला मतदानाचा हक्क बजावला आहे. १० लाख ३७ हजार ३५० पुरुषांपैकी ६ लाख २१ हजार ५६३ पुरुषांनी तर ९ लाख ५६ हजार ६११ महिलांपैकी ५ लाख २८ हजार ९५४ महिलांनी मताधिकार बजावीला. ८५ तृतीयपंथियांपैकी १९ तृतीयपंथी यांनी मतदान केले. एकूण ५७.७० % मतदान जळगाव लोकसभा मतदारसंघात झाले.
तर रावेर लोकसभा मतदारसंघात १८ लाख २१ हजार ७५० मतदारांपैकी ११ लाख ४७ हजार ९६५ मतदारांनी मतदान केले. यामध्ये ९ लाख ४१ हजार ७३२ पुरुषांपैकी ६ लाख ८ हजार १५९ पुरुषांनी तर ८ लाख ७९ हजार ९६४ महिलांपैकी ५ लाख ३९ हजार ७९६ महिलांनी मताधिकार बजावला. ५४ तृतीयपंथियांपैकी १० जणांनी मतदान केले.
विधानसभा मतदारसंघ निहाय टक्केवारीचा विचार केला तर भाजपच्या जिल्ह्यातील चौघा आमदारांच्या मतदारसंघात कमी मतदान झाल्याचे दिसून आले आहे. यात गिरीश महाजन यांच्या जामनेर मतदारसंघात 60.18%, संजय सावकारे यांच्या भुसावळ मतदारसंघात 57.33, सुरेश उर्फ राजू मामा भोळे यांच्या जळगाव शहर मतदार संघात 52.50 तर मंगेश चव्हाण यांचे चाळीसगाव येथे 55.01 असे मतदान झाले आहे. तर शिवसेना शिंदे गटाच्या आमदारांच्या मतदारसंघात समाधानकारक टक्केवारी आहे. यात लता सोनवणे यांच्या चोपडा मतदारसंघात 61.52, गुलाबराव पाटील यांच्या जळगाव ग्रामीण मतदार संघात 62.60, चिमणराव पाटील यांच्या एरंडोल-पारोळा मतदारसंघात 61.76 तर किशोर पाटील यांच्या पाचोरा येथे 59.82 असे मतदान झाले आहे.
याशिवाय राष्ट्रवादी अजित पवार गटाच्या अनिल पाटील यांच्या अमळनेर मतदारसंघात 55. 94, अपक्ष आमदार चंद्रकांत पाटील यांच्या मुक्ताईनगर मतदारसंघात 64.56 मतदान टक्केवारी असून सर्वाधिक टक्केवारी काँग्रेस आमदारांच्या मतदारसंघात आहे. यावल-रावेर या शिरीष चौधरी यांच्या मतदारसंघात 67.77 तर राजेश एकडे यांच्या मलकापूर मतदारसंघात 67.36% इतके मतदान झालेले आहे.
*जळगाव लोकसभा मतदारसंघ- विधानसभानिहाय मतदानाची टक्केवारी*
▪️ जळगाव शहर विधानसभा मतदारसंघ –52.90 %
▪️ जळगाव ग्रामीण विधानसभा मतदारसंघ –62.60 %
▪️ अमळनेर विधानसभा मतदारसंघ –55.94 %
▪️ एरंडोल विधानसभा मतदारसंघ –61.76 %
▪️ चाळीसगाव विधानसभा मतदारसंघ –55.01 %
▪️ पाचोरा विधानसभा मतदारसंघ -59.82 %
*रावेर लोकसभा मतदारसंघ- विधानसभानिहाय मतदानाची टक्केवारी*
▪️ चोपडा विधानसभा मतदारसंघ –61.52 %
▪️ रावेर विधानसभा मतदारसंघ –67.77 %
▪️ भुसावळ विधानसभा मतदारसंघ –57.33 %
▪️ जामनेर विधानसभा मतदारसंघ –60.18 %
▪️ मुक्ताईनगर विधानसभा मतदारसंघ –64.56 %
▪️ मलकापुर विधानसभा मतदारसंघ – 67.36 %
