मुंबई (वृत्तसंस्था) – बारामती शहर परिसरामध्ये पोलिसांवर हल्ला झाल्याची खळबळजनक घटना उघडकीस आली असून शहरातील जळोची भागामध्ये हा हल्ला झाला आहे.विशेष म्हणजे पोलिसांवर करण्यात आलेला हा हल्ला होम क्वारंटाईन केलेल्या नागरीकांद्वारे करण्यात आला आहे. या घटनेमध्ये ४ पोलीस अधिकारी,५ पोलीस कर्मचारी जखमी झाले असून जखमींमध्ये २ महिला पोलीस अधिकाऱ्यांसह एका महिला पोलीस कर्मचाऱ्याचा समावेश आहे. कोरोनाच्या पार्श्वभुमीवर जळोची परिसरातील काही नागरीकांना वैद्यकीय विभागाने होम क्वारंटाईन केले आहे. तसा शिक्का देखील या नागरिकांच्या हातावर मारण्यात आला आहे. शुक्रवारी दुपारी हे होम क्वारंटाईन केलेले नागरीक परिसरात फिरत होते. यावेळी स्थानिकांनी या क्वारंटाईन केलेल्या नागरिकांना बाहेर फिरु नका, असे सुचित करुन हटकले. या वरुन स्थानिक नागरीक आणि त्या नागरिकांमध्ये वाद झाला. या घटनेची माहिती मिळताच शहर पोलिसांनी याठिकाणी धाव घेतली. सुरवातीला पोलिसांनी दोन्ही गटाला समजावुन सांगण्याचा प्रयत्न केला. मात्र, आक्रमक झालेल्या होम क्वारंटाईन नागरिकांच्या गटाने पोलीसांवर जोरदार हल्ला चढविला. दगड, काठ्या, लोखंडी रॉडने पोलीसांवर हल्ला करत त्यांना गंभीर जखमी केलं. या हल्ल्यामध्ये शहर पोलीस निरीक्षक औदुंबर पाटील, सहायक पोलीस निरीक्षक पद्मराज गंपले, सहायक पोलीस निरीक्षक योगेश शेलार,सहायक पोलीस निरीक्षक आश्वीनी शेंडगे,पोलीस कर्मचारी पोपट नाळे, पोपट कोकाटे,सिध्देश पाटील, महिला पोलीस कर्मचारी स्वाती काजळे, रचना काळे यांचा समावेश आहे. जखमी पोलीस अधिकारी, कर्मचाऱ्यांना पायाला, हाताला तसेच डोक्याला दुखापत झाली आहे. आरोपींवर गुन्हा दाखल करण्याची प्रक्रिया सुरु करण्यात आली आहे.