मुक्ताईनगर (प्रतिनिधी) :- शहराजवळ भरधाव डंपरने दुचाकीला धडक दिल्याने झालेल्या भीषण अपघातात दोन तरुणांचा जागीच मृत्यू झाला. याप्रकरणी मुक्ताईनगर पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, १२ मे २०२६ रोजी रात्री सुमारे ११.४५ वाजेच्या सुमारास मुक्ताईनगर स्मशानभूमीजवळ हा अपघात घडला. बी.एन. अग्रवाल यांच्या डंपर क्रमांक १८६२ वरील चालकाने भरधाव व निष्काळजीपणे वाहन चालवत समोरून येणाऱ्या एमपी ६८ झेडडी ८१६० क्रमांकाच्या दुचाकीला जोरदार धडक दिली.
या अपघातात दुचाकी चालक राहुल गणपत ठाकूर (वय १९, रा. श्री कॉलनी, मुक्ताईनगर) तसेच मागे बसलेले राजकुमार गोपाल बरेला (रा. रोहणी बोरी बुजुर्ग, ता. जि. बुऱ्हाणपूर, मध्यप्रदेश) यांचा जागीच मृत्यू झाला. अपघातात दुचाकीचेही मोठे नुकसान झाले.
याप्रकरणी गोपाल ओंकार बरेला (वय ४२, रा. वॉर्ड क्र. १, श्री कॉलनी, मुक्ताईनगर) यांनी फिर्याद दिली आहे. त्यानुसार भारतीय न्याय संहिता अंतर्गत कलम १०६(१), २८१, ३२४(४) तसेच मोटार वाहन कायदा १९८८ चे कलम १८४ व १३४(ब) अन्वये डंपर चालकाविरुद्ध गुन्हा दाखल करण्यात आला आहे.या प्रकरणाचा पुढील तपास मुक्ताईनगर पोलिस करीत आहेत.
