शिवकॉलोनी भागातील घटना; सोन्याचे मंगळसूत्र आणि मनगटी घड्याळ लंपास, अज्ञात चोरट्यांविरुद्ध गुन्हा दाखल
मुक्ताईनगर (प्रतिनिधी): येथील शिवकॉलोनी भागात राहणाऱ्या एका सेवानिवृत्त बँक कर्मचाऱ्याच्या बंद घराचे कुलूप तोडून अज्ञात चोरट्यांनी घरफोडी केल्याची घटना उघडकीस आली आहे. लहान भावाच्या आजारपणामुळे आणि त्यानंतर झालेल्या निधनामुळे फिर्यादी कुटुंब परगावी गेले असताना चोरट्यांनी बंद घर गाठून साधारण १२ हजार रुपयांचा मुद्देमाल लांबवला आहे. याप्रकारणी मुक्ताईनगर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, मुक्ताईनगर येथील शिवकॉलोनीचे रहिवासी आणि ‘जळगाव जिल्हा मध्यवर्ती सहकारी’ (जेडीसीसी) बँकेचे सेवानिवृत्त कर्मचारी प्रदीपकुमार मधुकर चौधरी (वय ६३) यांचे लहान भाऊ दिलीप मधुकर चौधरी हे आजारी असल्याने, त्यांना भेटण्यासाठी प्रदीपकुमार हे १४ जून २०२६ रोजी घराला कुलूप लावून गेले होते. दरम्यान, लहान भावाचे निधन झाल्यामुळे ते शहापूर (ता. जि. बुऱ्हाणपूर) येथेच थांबले होते.
दिनांक १४ जूनच्या सकाळी १०.०० वाजेपासून ते ६ जुलैच्या सकाळी ६.०० वाजेच्या दरम्यान हे घर बंद होते. याच कालावधीत अज्ञात चोरट्यांनी घराच्या दरवाजाचे कुलूप तोडून आत प्रवेश केला. चोरट्यांनी घरातून: १) १०,००० रुपये किमतीचे १ ग्रॅम वजनाचे सोन्याचे मंगळसूत्र २) २,००० रुपये किमतीचे ‘ट्रायमॅक्स’ (Trymax) कंपनीचे हातघड्याळ असा एकूण १२,००० रुपयांचा मुद्देमाल चोरून नेला. ६ जुलै रोजी शेजारी राहणारे सुरेश भगवान पाटील यांनी प्रदीपकुमार चौधरी यांना फोन करून त्यांच्या घरात चोरी झाल्याची माहिती दिली.
माहिती मिळताच प्रदीपकुमार चौधरी यांनी तातडीने मुक्ताईनगर गाठले आणि घरची पाहणी करून ७ जुलै २०२६ रोजी संध्याकाळी ६.२३ वाजता मुक्ताईनगर पोलीस ठाण्यात तक्रार दिली. त्यांच्या फिर्यादीवरून अज्ञात चोरट्यांविरुद्ध मुक्ताईनगर पोलीस ठाण्यात गुन्हा रजि. नं. २८२/२०२६ नुसार भारतीय न्याय संहिता (BNS) २०२३ चे कलम ३०५(A) आणि ३३१(४) प्रमाणे गुन्हा दाखल करण्यात आला आहे.
घटनेची माहिती मिळताच मुक्ताईनगर पोलीस ठाण्याचे पोलीस निरीक्षक श्री. आशिष आडसूळ यांनी परिस्थितीची दखल घेतली आहे. त्यांच्या मार्गदर्शनाखाली पोलीस हेड कॉन्स्टेबल (पोहेकॉ/९०१) राजेश चव्हाण पुढील तपास करत आहेत. या गुन्ह्यात अद्याप कोणालाही अटक करण्यात आलेली नाही.
