महावितरणकडून वीजबिल वसुली मोहिमेस वेग
जळगाव (प्रतिनिधी): परिमंडलातील घरगुती, व्यावसायिक व औद्योगिक वर्गवारीतील सुमारे दोन लाख ग्राहकांकडे थकीत 177 कोटी रुपयांच्या वीजबिल वसुलीसाठी महावितरणने धडक मोहीम सुरू केली आहे. मागील जून महिन्यात वीजबिल थकबाकीमुळे 57 हजार ग्राहकांचा वीजपुरवठा खंडित करण्यात आला होता आणि संपूर्ण रकमेचा भरणा केल्यानंतर त्यांचा वीजपुरवठा पूर्ववत करण्यात आला. तरी ग्राहकांनी चालू बिलासह थकबाकी भरून सहकार्य करावे आणि वीजपुरवठा खंडित होण्याची कारवाई टाळावी, असे आवाहन महावितरणने केले आहे.
जळगाव परिमंडलात घरगुती, व्यावसायिक, औद्योगिक व इतर वर्गवारीतील एकूण 1 लाख 87 हजार 524 ग्राहकांकडे 177 कोटी 69 लाख रुपयांची वीजबिल थकबाकी आहे. यापैकी जळगाव मंडलातील 1 लाख 8 हजार 624 ग्राहकांकडे 96 कोटी 57 लाख, धुळे मंडलातील 56 हजार 776 ग्राहकांकडे 60 कोटी 66 लाख व नंदुरबार मंडलातील 22 हजार 124 ग्राहकांकडे 20 कोटी 47 लाख रुपयांची थकबाकी आहे.
थकबाकी वसुलीसाठी जळगाव परिमंडलातील जळगाव, धुळे व नंदुरबार मंडलात महावितरणतर्फे धडक वसुली मोहीम सुरू करण्यात आलेली आहे. मुख्य अभियंता आय.ए. मुलाणी यांच्या मार्गदर्शनाखाली सर्व अधीक्षक अभियंते, कार्यकारी अभियंते, उपविभागीय अभियंते, शाखा अभियंते, तांत्रिक कर्मचारी या मोहिमेत प्रत्यक्ष ग्राहकांकडे भेट देऊन थकबाकी वसुलीसाठी सरसावले आहेत. अनेक ग्राहक तातडीने बिल भरून सहकार्य करत आहेत. तर जे ग्राहक बिल भरण्यास प्रतिसाद देत नाहीत, त्यांचा वीजपुरवठा नाईलाजास्तव खंडित करण्याची कारवाई या मोहिमेत करण्यात येत आहे. मागील जून महिन्यात जळगाव मंडलातील 36 हजार 821, धुळे मंडलातील 13 हजार 376 व नंदुरबार मंडलातील 7 हजार 134 ग्राहकांचा वीजपुरवठा थकबाकीपोटी खंडित करण्यात आला. यामध्ये 5 हजार रुपयांवरील थकबाकीदारांचे सध्याचे मीटर व सर्व्हिस वायर काढून घेण्यात येणार आहे. यानंतरही ग्राहक अनधिकृतरित्या वीज वापरताना आढळला तर त्याच्यावर कायदेशीर पोलिस कारवाई करण्यात येत आहे. तरी जळगाव परिमंडलातील सर्व ग्राहकांनी थकबाकी व चालू वीजबिले भरून सहकार्य करावे व संभाव्य गैरसोय टाळावी, असे आवाहन महावितरणच्या जळगाव परिमंडलाचे मुख्य अभियंता आय.ए. मुलाणी यांनी केले आहे.
वीजबिल भरण्यासाठी विविध पर्याय उपलब्ध
वीजबिल भरण्यासाठी महावितरणने अधिकृत वीजबिल भरणा केंद्रांसह विविध ऑनलाईन पर्याय उपलब्ध करून दिले आहेत. वीजबिलावरील क्यूआर कोड स्कॅन करून वीजबिल भरता येते. महावितरण मोबाईल ॲप, www.mahadiscom.in हे संकेतस्थळ तसेच विविध यूपीआय ॲपद्वारे घरबसल्या ऑनलाईन वीजबिल भरता येते. वेळेत ऑनलाईन वीजबिल भरल्यास 0.25 टक्के सूटही मिळते. गो-ग्रीन योजनेअंतर्गत ई-वीजबिल पर्याय निवडल्यास एकरकमी 120 रुपये सूट मिळते तसेच महावितरणच्या संकेतस्थळावर रजिस्ट्रेशन केल्यास ऑनलाईन वीजबिल भरण्याचे पर्याय उपलब्ध होतात.
